महासमुंद, 30 सितंबर 2024। पिथौरा ब्लॉक के घोघरा ग्राम पंचायत के डेढ़ साल के मासूम बच्ची ट्विंकल जेन गंभीर कुपोषण (एसएएम) ले जूझत रहिस। बहुतेच कमजोर होए के सेती ओखर शारीरिक विकास रुक गए रहिस। ओखर मां ह ए स्थिति ल सुधारे बर कई प्रयास करिस, फेर स्थिति म सुधार नइ होत रहिस। एक दिन, ट्विंकल के मां ल पिथौरा के पोषण पुनर्वास केंद्र (एनआरसी) के बारे म पता चलिस। उहां ले मिले जानकारी ले प्रेरित होके वो अपन गाँव लहुटिस अऊ स्थानीय आंगनवाड़ी कार्यकर्ता अऊ मितानिन ले संपर्क करिस। वो ह एनआरसी के लाभ के बारे म बने जानकारी पा के ट्विंकल ल ए केंद्र म भर्ती करिस।
एनआरसी म भर्ती होए के बाद ट्विंकल के नियमित देखभाल अऊ पोषण उपर विशेष ध्यान देहे गीस। कार्यकर्ता मन ह ट्विंकल के मां ल समझाइस के कुपोषण ले बचाय बर पौष्टिक आहार कतका जरूरी हे। उमन काउंसलिंग के समय ये घलोक बताइन के बाजार ले मिलइया खाए के चीज ट्विंकल बर सही नइ ये, अऊ घर के बने पौष्टिक भोजन ही ओला ताकत देही।
आंगनबाड़ी के रेडी टू ईट ल खाए म सामिल करे के सलाह देहे गीस। कार्यकर्ता मन ह समझाइन तब सिरिफ एक महीना म ही ट्विंकल के सेहत म उल्लेखनीय सुधार होइस। ओखर वजन बाढ़ीस अऊ वो धीरे-धीरे स्वस्थ होए लगीस। अऊ वो सैम (कुपोषण) के स्थिति ले बाहिर आके सामान्य स्थिति म आ गे।