राज्य मनरेगा कार्यालय ह सबो कलेक्टर मन ल जारी करिस परिपत्र
रायपुर, सुपोषण बर पोषक तत्व ले भरपूर मुनगा के उपयोग ल बढ़ावा देहे मनरेगा (महात्मा गांधी राष्ट्रीय ग्रामीण रोजगार गारंटी अधिनियम) अभिसरण ले एखर पौधा लगाए जाही। राज्य मनरेगा आयुक्त श्री मोहम्मद कैसर अब्दुलहक ह एखर बर सबो जिला के कलेक्टर-सह-जिला कार्यक्रम समन्वयक (मनरेगा) ल परिपत्र जारी करे हे। उमन केन्द्रीय ग्रामीण विकास मंत्रालय के दिशा-निर्देश अऊ प्रावधान के मुताबिक ये संबंध म जरूरी कार्यवाही करे ल कहे हें।
राज्य मनरेगा कार्यालय कोति ले जारी परिपत्र म कलेक्टर मन ल अवगत कराए गए हे कि मुनगा वृक्षारोपण सामुदायिक या व्यक्तिगत संपत्ति (अत्यंत गरीब परिवार के लिए) काम के रूप म एक अनुमेय उद्यानिकी गतिविधि ये। केन्द्रीय ग्रामीण विकास मंत्रालय कोति ले मई-2020 म व्यक्तिगत लाभार्थि अऊ समुदाय मन बर पोषण उद्यान ल बढ़ावा देहे राज्य शासन के योजना अऊ राष्ट्रीय ग्रामीण आजीविका मिशन (NRLM) के संग अभिसरण ले मुनगा वृक्षारोपण काम बर दिशा-निर्देश जारी करे गए हे।
परिपत्र म कहे गए हे कि दीनदयाल अंत्योदय योजना-राष्ट्रीय ग्रामीण आजीविका मिशन (DAY-NRLM) अपन कई ठन पहलु मन के माध्यम ले मुनगा वृक्षारोपण ल बढ़ावा देवत हे। कुछ राज्य मन म राज्य ग्रामीण आजीविका मिशन (SRLM) कोति ले स्वसहायता समूह मन के सदस्य मन के बीच वितरण बर मुनगा के नर्सरी तियार करे हे। दीनदयाल अंत्योदय योजना-राष्ट्रीय ग्रामीण आजीविका मिशन म कृषि सखी ल घलोक प्रशिक्षित अऊ तैनात करे गए हे, जेन वृक्षारोपण अऊ कृषि-पोषक उद्यान ल बढ़ावा देहे अऊ रखरखाव के काम ले बने सहिन परिचित हें। राष्ट्रीय ग्रामीण आजीविका मिशन म एग्रो-इकोलॉजिकल प्रेक्टिस अउ फॉरवार्ड-लिंकेज बर महिला किसान सदस्य मन के संग उत्पादक समूह मन के स्थापना करे गए हे। परिपत्र के संग कलेक्टर मन ल मनरेगा के तहत मुनगा वृक्षारोपण ल बढ़ावा देहे बर केन्द्रीय ग्रामीण विकास मंत्रालय ले प्राप्त संयुक्त एडवायजरी घलोक प्रेषित करे गए हे।
