- भूमिहीन कृषि मजदूर मन ल हर बछर मिलही 6 हजार रुपिया के मदद
- 3 लाख 55 हजार हितग्राही मन ल मिलही पहिली किश्त के राशि
रायपुर, छत्तीसगढ़ म नवा सरकार के गठन के बाद ‘न्याय सब्बो बर-सब्बो डहर’ के ध्येय ल लेके योजना मन ल लागू करे जात हे अऊ ओखर क्रियान्वयन घलोक करे जात हे। कई वर्ग बर ‘न्याय’ के कड़ी म अब ग्रामीण भूमिहीन कृषि मजदूर परिवार बर ‘न्याय’ मिलइया हे। ये योजना के शुरुआत अवइया 3 फरवरी के होही। सांसद श्री राहुल गांधी राजधानी रायपुर के साईंस कॉलेज मैदान म ये योजना के शुभारंभ करहीं। राज्य सरकार कोति ले शुरू करे जात ये योजना के तहत ग्रामीण भूमिहीन कृषि मजदूर परिवार ल हर साल 6 हजार रुपिया के आर्थिक मदद देहे जाही। एखर खातिर राज्य के अनुपूरक बजट म 200 करोड़ रुपिया के प्रावधान करे गए हे। कार्यक्रम म सांसद श्री राहुल गांधी योजना बर पात्र 3 लाख 55 हजार भूमिहीन कृषक मजदूर मन ल डीबीटी के माध्यम ले सीधा ऊंखर बैंक खाता म राशि अंतरित करहीं।
