सी-मार्ट के खुले अऊ बंद होए के समय ग्राहक मन के सुविधानुरूप होवय- मुख्यमंत्री
महिला समूह कोति ले निर्मित उत्पाद मन के सी-मार्ट म खरीदी-बिक्री के मुख्यमंत्री ह करिन समीक्षा
रायपुर, मुख्यमंत्री श्री भूपेश बघेल ह काली अपन निवास कार्यालय म महिला समूह मन कोति ले बनाए उत्पाद मन के सी-मार्ट म खरीदी- बिक्री के समीक्षा बैठक लीन। बैठक म मुख्यमंत्री ह बिक्री बढ़ाए उपर जोर देवत कहिन कि सी-मार्ट के उद्देश्य स्थानीय उत्पाद अउ महिला स्व सहायता समूह, कुम्भकार, आन पारंपरिक कुटीर उद्योग मन ल बढ़ावा देना हे। एखर संगेच सी-मार्ट के माध्यम ले स्थानीय निवासी मन ल रोगजार के बेहतर अवसर अऊ नागरिक मन ल एके जगा म गुणवत्तायुक्त समान उचित कीमत म उपलब्ध कराए जात हे।
उमन कहिन कि सी-मार्ट म उत्पाद मन के जादा बिक्री स्थानीय बाजार अऊ रोगजार ल बढ़ावा देही। सी-मार्ट के उत्पाद मन ल लोकप्रिय बनाए बर बनेच मार्केटिंग करे जाए। मुख्यमंत्री श्री बघेल ह कहिन कि उत्पाद मन के बिक्री बर स्वच्छता दीदी अऊ मितानिन मन के सहायता लेहे जा सकत हे एखर से ओ मन ल घलोक अकतहा आय होही। एखर संगेच उत्पाद मन के सोशल मीडिया म प्रचार-प्रसार घलोक करव।
श्री बघेल ह कहिन कि सी-मार्ट के खुले अऊ बंद होए के समय ग्राहक मन के सुविधा के मुताबिक होना चाही। उमन निर्देश दीन कि अइसन व्यवस्था बनावव जेखर से जादा ले जादा ग्राहक अपन सुविधा के मुताबिक सी-मार्ट आ सकयं। उमन कहिन कि ये बात ल ठउका करव कि उत्पादक मन के भुगतान तुरंते होवय।
समीक्षा बैठक म अधिकारी मन ह बताइन कि राज्य के 29 सी-मार्ट म पाछू 9 महिना म कुल 70 लाख ले जादा के बिक्री करे हें। ए सी-मार्ट म सबले जादा बिक्री के उत्पाद मन म मास्क, साबुन, दोना पत्तल, ग्लिसरीन, सरसों तेल, महुआ सैनिटाईजर आदि सामिल हे।
बैठक म वन मंत्री श्री मोहम्मद अकबर, मुख्यमंत्री के सलाहकार श्री राजेश तिवारी अउ प्रदीप शर्मा, मुख्य सचिव श्री अमिताभ जैन, अपर मुख्य सचिव श्री सुब्रत साहू, वन विभाग के प्रमुख सचिव श्री मनोज पिंगुआ, मुख्यमंत्री के सचिव श्री डी.डी. सिंह, पंचायत अउ ग्रामीण विकास विभाग के सचिव श्री प्रसन्ना आर, राजस्व अउ आपदा विभाग के सचिव श्री एनएन एक्का, पीसीसीएफ श्री राकेश चतुर्वेदी, राज्य लघु वनोपज संघ के प्रबंध संचालक श्री संजय शुक्ला, श्री अरूण प्रसाद उपस्थित रहिन।
