कोरिया, स्वच्छ, सुंदर, समृद्ध गांव के उद्देश्य के संग स्वच्छता दीदि मन आज ले ओड़गी ग्राम पंचायत म डोर-टू-डोर कचरा कलेक्शन के शुरुआत करिन। एखर संगेच ठोस अऊ तरल अपशिष्ट प्रबंधन बर सेग्रिगेशन यूनिट घलोक शुरू करे गीस।
संसदीय सचिव अऊ बैकुण्ठपुर विधायक श्रीमती अम्बिका सिंहदेव, कलेक्टर श्री कुलदीप शर्मा अऊ जिला पंचायत सीईओ श्री कुणाल दुदावत ह आज स्वच्छ भारत मिशन ग्रामीण के अंतर्गत ग्राम पंचायत ओड़गी के पंचायत भवन कार्यालय परिसर म ठोस अऊ तरल अपशिष्ट प्रबंधन बर कचरा कलेक्शन बर चार ई-रिक्शा के शुभारंभ हरी झंडी देखाके करिन। ई-रिक्शा के माध्यम ले ग्राम पंचायत क्षेत्र म स्वच्छता दीदि मन घरो-घर जाके कचरा कलेक्शन करहीं।
संसदीय सचिव व बैकुण्ठपुर विधायक श्रीमती सिंहदेव ह स्वच्छता दीदि मन ल शुभकामना दीन अऊ ओ मन ल बेहतर काम करे बर प्रोत्साहित करिन। कलेक्टर श्री शर्मा ह उपस्थित स्वच्छता दीदि अऊ गांव वाले मन ल अपन के प्रयास ले अपशिष्ट प्रबंधन करे के तरीका के जानकारी दीन। उमन ग्राम पंचायत ल स्वच्छ, सुंदर अऊ समृद्ध बनाए बर घर म डस्टबिन के उपयोग ठउका करे ल कहिन जेखर से स्वच्छता दीदि मन ल कचरा कलेक्शन म आसानी होवय। एखर संगेच उमन गांव वाले मन ल मवेशि मन के बेहतर प्रबंधन अऊ मवेशी मन ल गौठान भेजे के अपील करिन। कलेक्टर के कहे म सबो गांव वाले मन ह गांव म स्वच्छता बनाये रखे के शपथ लीन। ये बेरा म ग्राम पंचायत के प्रतिनिधि अऊ जिला प्रशासन के अधिकारी-कर्मचारी मन संग गाव वाले मन तको मौजूद रहिन।
स्वच्छ, सुंदर, समृद्ध गांव के उद्देश्य के संग ओड़गी पंचायत म घरो-घर कचरा सकेलई शुरु
