जांजगीर-चाम्पा : देरी ले आना अऊ जल्दी जाना, जिला म नइ चलय ये बहाना

जांजगीर-चाम्पा, शासन के आदेश निर्देश अऊ कलेक्टर के हिदायत मन ल अनदेखा करइया अइसन लापरवाह कर्मचारी मन उपर जल्दीच कार्यवाही के गाज गिरही जेन बेरा म न तो अपन कार्यालय पहुंचयं अऊ न ही निरधारित समय तक कार्यालय म रहयं। जिला म शासकीय अधिकारी मन अऊ कर्मचारी मन के संबंध म जनप्रतिनिधि मन ले सरलग आवत शिकायत मन ल देखत कलेक्टर श्री तारन प्रकाश सिन्हा ह सबो कार्यालय मन म फेस रीडिंग मशीन लगाय के निर्णय लेहे हें। ए मशीन मन के कार्यालय म लगे के बाद हर अधिकारी-कर्मचारी ल निरधारित समय म अपन उपस्थिति दर्शाना होही, इही नहीं निरधारित समय तक काम करे के बाद जात बेरा घलोक ओ मन ल अपन चेहरा या फिंगरप्रिंट मशीन म दर्ज करना होही। ये व्यवस्था के लागू होए के बाद जिला म देरी ले आके कार्यालय ले जल्दी चले जाय के प्रवृत्ति म जिहां अंकुश लगही, उहें आम जनता के समस्या मन के निराकरण अउ शासन के योजना मन के क्रियान्वयन घलोक आसानी ले होही।
जिला म कलेक्टर के रूप म पदस्थ होए के बाद श्री तारन प्रकाश सिन्हा ह पहली बैठक म ही सबो सरकारी कर्मचरी मन ल निरधारित समय म कार्यालय आए के निर्देश देहे रहिन। इही नहीं जिला के सबो विकासखण्ड मुख्यालय के कार्यालय अउ स्कूल, आंगनबाड़ी केंद्र, स्वास्थ्य केंद्र, उचित मूल्य के दुकान मन के अलावा आन सरकारी दफ्तर मन के निरीक्षण के बाद उमन ब्लाक मुख्यालय लेबल के अधिकारी मन के बैठक लेके सख्त हिदायत घलोक देहे रहिन। ऊंखर पाछू तीन महिना के कार्यकाल म उदुपहा जांच तको करे रहिन, तेम बहुत अकन कार्यालय के अधिकारी अऊ कर्मचारी मन के अनुपस्थिति घलोक उजागर होए रहिस। शासकीय कार्यालय मन म समय म अधिकारी-कर्मचारी मन नइ आए म आम जनता म नाराजगी के संग जनप्रतिनिधि मन म आक्रोश तो रहिबे करिस, संगेच शासन कोति ले निरधारित जनहितैषी काम मन के अलावा शासन के जनकल्याणकारी योजना मन के क्रियान्वयन म घलोक लापरवाही होवत रहिस। कलेक्टर ह जिला म सरकारी व्यवस्था ल दुरस्त करे के ठानिन अऊ निर्देश के अवहेलना कारइया ल सही रद्दा म लाय बर आधुनिक फेस रीडिंग मशीन लगाय के फैसला लीन।