सेवा संकल्प अभियान: सांता के ओम प्रकाश ल मिलिस संकर नस्ल के गाय, उपरहा कमई ले बनिस आत्मनिर्भर

CHHATTISGARHI NEWS: जशपुर, छत्तीसगढ़ शासन के सेवा संकल्प अभियान 2026 ग्रामीण इलाका के मनखे मन बर आर्थिक तरक्की के नवा रद्दा खोलत हवय। इही कड़ी म जशपुर जिला के सांता क्षेत्र के रहइया ओम प्रकाश के जिनगी म एक सुग्घर बदलाव आए हे। ओम प्रकाश ल ए अभियान के तहत उच्च नस्ल के संकर गाय मिले हवय, जेकर से वोला दुग्ध उत्पादन के जरिए उपरहा आमदनी के बढ़िया साधन मिलगे हवय अउ वोहा आर्थिक रूप ले आत्मनिर्भर बनगे हवय।
पहिली ओम प्रकाश के परिवार ला आर्थिक तंगी अउ कई किसिम के चुनौती मन के सामना करे बर परत रहिस। किसानी के अलावा आमदनी के कोनो दूसर पक्का जरिया नइ होने के सेती घर चलाना कठिन होवत रहिस। फेर जब उनला सेवा संकल्प अभियान के बारे म जानकारी मिलिस, त वोहा ए योजना बर आवेदन करिस। अभियान के तहत मिले संकर नस्ल के गाय ले वोखर जिनगी बदलगे। अब वो ह रोज दूध बेचके नियमित रूप ले धन कमावत हवय।
गाय पालन के काम शुरू होए के बाद दूध बिक्री ले मिलत पैसा से परिवार के आर्थिक स्थिति म सुधार होए लागे हवय। अब लइका मन के पढ़ई-लिखई अउ घर के दूसर खर्चा ला संभाले म ओम प्रकाश ल कोनो किसिम के परेशानी अब नइ होवत हवय। अपन मेहनत अउ शासन के ए सुग्घर योजना के सहयोग ले ओम प्रकाश आज एक सफल पशुपालक के रूप म अपन पहचान बनावत हवय।
ए सफलता के सेती ओम प्रकाश शासन अउ प्रशासन के प्रति आभार व्यक्त करत हवय। वोकर कहना हवय के सेवा संकल्प अभियान न सिर्फ वोला आर्थिक मजबूती दीस, बल्कि समाज म सम्मान के संग जिए के अवसर घलो प्रदान करिस। ओम प्रकाश के ए कहानी छत्तीसगढ़ के दूसर ग्रामीण मन बर घलो प्रेरणा के स्रोत बनगे हवय, जेन ये बताथे के सरकारी योजना मन के सही उपयोग ले कइसे जिनगी ला सुधारे जा सकथे।