बिलासपुर, जिला म कोविड-19 के ओमिक्रॉन वेरिएंट के एक मरीज के पुस्टि होए हे। स्वास्थ्य विभाग के अधिकारी मन ह बताइन के संयुक्त अरब अमीरात ले लहुटे बिलासपुर जिला के एक 52 साल के मनखे के कोरोना पीड़ित होए के बाद ओखर सैंपल जिनोमिक सिक्वेंसिंग जांच (WGS) बर इंस्टीट्यूट ऑफ लाइफ साइंसेज भुवनेश्वर भेजे गए रहिस। स्वास्थ्य विभाग ल आज जांच रिपोट मिले हे जेमां कोविड-19 के ओमिक्रॉन (“Omicron” B.1.1529) वेरिएंट के पुस्टि होए हे।
जानबा हे के कोरोना के ओमिक्रॉन वैरिएंट के संक्रमण दुनिया भर म तेजी ले फैलत हे। ये बीच विश्व स्वास्थ्य संगठन ह कहे हे के ओमिक्रॉन जतका तेजी ले फइलही, वोतकेच जल्दी वायरस के नवा वैरिएंट के आए के आशंका हे। डब्लूएचओ के सीनियर इमरजेंसी ऑफिसर कैथरीन स्मॉलवुड के कहना हे के ओमिक्रॉन के तेज संक्रमण के दर के उल्टा असर पर सकत हे।
बिलासपुर म मिलिस ओमिक्रॉन मरीज: स्वास्थ्य विभाग करिस पुस्टि
