गांव वाले मन के जीवन म आही अंजोर, मुख्यमंत्री के जताइन आभार
जशपुर, 07 सितंबर 2024। आजादी के 75 साल बाद जशपुर जिला के बगीचा ब्लॉक म स्थित महुआपानी गांव म आखिरकार वो दिन अवइया हे, जब अंधियारी ल चीर के पहली पइ बिजली पहुंचइया हे। ये गांव विशेष पिछड़ी जनजाति कोरवा बाहुल्य हे, जेन अब तक बिजली जइसे बुनियादी सुविधा ले वंचित रहिस। मुख्यमंत्री श्री विष्णु देव साय के संवेदनशील पहल ले पीएम जनमन योजना के तहत ए गांव म बिजली पहुंचाए के काम पास हो गए हे।
महुआपानी गांव के ये बड़का उपलब्धि तब संभव हो पाइस जब गांव वाले मन ह मुख्यमंत्री के कैंप कार्यालय म गांव म बिजली के समस्या ल लेके आवेदन दीन। उंखर समस्या ल गंभीरता ले लेत जल्दी कार्रवाई करे गीस अऊ अब गांव म बिजली के सुविधा मिलइया हे। ए खबर ले पूरा गांव म उत्साह के माहौल हे अऊ गांव वाले मन ह मुख्यमंत्री ल धन्यवाद देवत हें।
जानबा हे कि ये गांव जशपुर जिला मुख्यालय ले 85 किलोमीटर दूर स्थित हे अऊ इहां 100 ले जादा परिवार रहिथे, जेन कइ बछर ले बिजली के बिना कठिन जीवन बितात रहिन। गांव म बिजली पहुंचे ले शिक्षा, स्वास्थ्य, अऊ रोजगार के नवा अवसर खुलही, जेखर से गांव वाले मन के जीवन म एक नवा बदलाव आही।
गांव के आलु राम, भदई राम, खुलु पैकरा अऊ रामबिसाल यादव ह बताइस के बिजली आए के खबर ले गांव म उत्सव जइसे माहौल हे। उमन ए ऐतिहासिक पहल बर मुख्यमंत्री श्री साय के आभार व्यक्त करे हें। गांव वाले मन के मानना हे कि बिजली के सुविधा ले ऊंखर जीवन म बड़का सुधार आही अऊ ऊंखर लइका मन के शिक्षा अऊ रोजगार के अवसर घलोक बाढ़ही। बिजली पहुंचे ले कोरवा जनजाति के ए गांव म नवा उम्मीद जागे हे अऊ तकनीकी रूप ले जुड़े ले ऊंखर जीवन म एक बड़का सकारात्मक बदलाव आही।