नगर सैनिक मन के 465 पद म भर्ती प्रक्रिया 16 सितमबर ले, 21 हजार उम्मीदवार होही सामिल
200 पुरूष नगर सैनिक अऊ 265 महिला नगर सैनिक के होही भर्ती
बिलासपुर, 10 सितमबर 2024। मुख्यमंत्री श्री विष्णु देव साय के निर्देश म लगभग एक दशक बाद नगर सैनिक मन के पद म भर्ती के कार्यवाही शुरू हो गए हे। बिलासपुर राजस्व संभाग के जिला मन बर 465 पद म भर्ती करे जाही। भरनी परसदा स्थित अग्निशमन अउ एसडीआरएफ मैदान म अवइया 16 सितमबर ले 1 अकटूबर तक भर्ती होही। नगर सैनिक के 465 पद बर लगभग 21 हजार उम्मीदवार मन ह आवेदन करे हे। बिलासपुर के कलेक्टर श्री अवनीश शरण अऊ पुलिस अधीक्षक श्री रजनेश सिंह ह आज भरनी परसदा स्थित अग्निशमन अउ एसडीआरएफ मैदान के निरीक्षण करके संबंधित अधिकारी मन ल जरूरी तैयारी ठउका करे के निर्देश दीन।
अग्निशमन अउ आपातकालीन सेवा के डीआईजी श्री एस.के. ठाकुर ह बताइस कि स्वीकृत 465 पद म ले 200 पद नगर सैनिक के अऊ 265 पद महिला छात्रावास म महिला नगर सैनिक के हे। हर दिन लगभग 1500 उम्मीदवार मन के दक्षता परीक्षा मैदान म होही। दक्षता परीक्षा 100 अंक के होही। पुरूष उम्मीदवार मन बर 100 मीटर दौड़, 800 मीटर दौड़, लम्बी कूद अऊ ऊंची कूद होही। महिला उम्मीदवार मन बर 100 मीटर दौड़ ल छोड़कर शेष तीनों प्रतियोगिता होही। नगर सैनिक के 200 पद म ले बिलासपुर जिला बर 75 पद अउ मुंगेली, गौरेला-पेंड्रा-मरवाही, रायगढ़, कोरबा अऊ जांजगीर-चांपा जिला बर 25-25 पद सामिल हे। सबो उम्मीदवार मन ल तिथिवार कॉल-लेटर जारी कर दे गए हे। दक्षता परीक्षण के समय उम्मीदवार मन ल जाति प्रमाण पत्र, निवास प्रमाण पत्र, रोजगार कार्यालय पंजीयन, एनसीसी-सी सर्टिफिकेट, हैवी वाहन ड्राइविंग लाइसेंस, संभाग स्तरीय या जादा स्तर के खेलकूद प्रतियोगिता प्रमाण पत्र के संग पहुंचना होही।
बिलासपुर के कलेक्टर अऊ पुलिस अधीक्षक ह आज भरनी परसदा स्थित अग्निशमन अउ एसडीआरएफ मैदान के निरीक्षण कर तैयारियों के जायजा ले अऊ संबंधित अधिकारी मन ल जिम्मेदारी सौंपीन। उमन भर्ती मैदान के समतलीकरण, मैदान के घेराबंदी अउ बैरिकेडिंग, कई ठन इवेन्ट्स बर जरूरी व्यवस्था, मेडिकल टीम, पेयजल, कूड़ादान, चलित शौचालय, भर्ती मैदान अउ ओखर आसपास कानून-व्यवस्था अउ यातायात बर जरूरी इंतजाम करे के निर्देश दीन। डीएफओ श्री सत्यदेव शर्मा अऊ जिला पंचायत के सीईओ श्री रामप्रसाद चौहान घलोक ए दौरान मौजूद रहिन।