- मजदूरी भुगतान बर मिलिस 404 करोड़ रूपिया
- मुख्यमंत्री ह प्रधानमंत्री के व्यक्त करिस आभार
रायपुर, 06 अप्रैल 2020। मुख्यमंत्री श्री भूपेश बघेल ह प्रधानमंत्री श्री नरेन्द्र मोदी ल चिट्ठी लिखके महात्मा गांधी राष्ट्रीय ग्रामीण रोजगार गारंटी योजना के अंतर्गत लंबित मजदूरी भुगतान अऊ अवइया तीन महिना के मजदूरी बर लउहे राशि जारी करे के अनुरोध करे रहिन। केन्द्र सरकार ह ये म कार्यवाही करत 685.29 करोड़ रूपिया जारी कर देहे गए हे। मुख्यमंत्री श्री भूपेश बघेल ह एखर बर प्रधानमंत्री श्री नरेन्द्र मोदी के आभार व्यक्त करे हें। ये राशि म ले 404 करोड़ रूपिया मजदूरी भुगतान बर दे गए हे। संगेच सामान अउ प्रशासनिक मद म व्यय बर भारत सरकार कोति ले 281.28 करोड़ रूपिया जारी करे गए हे। ये मद म 88.13 करोड़ रूपिया के राज्यांश मिलाके कुल 773.42 करोड़ रूपिया मनरेगा काम मन मे व्यय करे जाही।
पंचायत अउ ग्रामीण विकास मंत्री श्री टी.एस. सिंहदेव ह बताइस के मुख्यमंत्री श्री भूपेश बघेल कोति ले भारत सरकार ले चिट्ठी लिख के वित्तीय साल 2020-21 बर मनरेगा काम मन बर राशि जल्दी जारी करे के मांग करे गए रहिस। उंखर पहल म केंद्र सरकार कोति ले चालू वित्तीय साल म मजदूरी, सामान अऊ प्रशासनिक व्यय बर ये राशि जारी करे गए हे। उमन बताइन के भारत सरकार कोति ले चालू वित्तीय साल म मजदूरी भुगतान के पहली किस्त के रूप म 934.70 करोड़ स्वीकृत करे गए हे। एमां ले 404.01 करोड़ रूपिया राज्य ल मिल गे।
