डिजिटल इंडिया युग म बंजोडा गांव के बेटी अनिता विकास म करत हे सहयोग

कोण्डागांव, बंजोडा गांव ल कभू अति संवेदनशील क्षेत्र माने जात रहिस, जिहां फोन करे बर एती-ओती घूम के बड़ मुश्किल ले नेटवर्क खोज के फोन लगता रहिस। आज बदले भारत के संग अब हर चीज़ डिजिटल होए लगे हे, संगेच सुदूर अंचल मन म शासन कोति ले मोबाईल कनेक्टीविटी पहुंचाए जात हे। जेखर से समाज म अमूल चूल बदलाव दिखे लगे हे। जिहां महिला मन के क्षेत्र के विकास म भागीदारिता दिन ब दिन बढ़त जात हे। ये संवेदनशील अंचल के निवासी अनिता वैध ह घलोक अपन क्षेत्र के विकास बर ठान लेहे हे अऊ वो दिन-रात क्षेत्र के विकास म अपन योगदान देवत हे।
अनिता ह 12वी पढ़े के बाद गांवे म रोजगार के तलाश करे के कोसिस करिस। तब ओ ल मनरेगा योजना म गांव म महिला मेट के रुप म काम मिल गे। एखर पाछू वो ह महिला मेट बर जनपद पंचायत फरसगांव ले प्रशिक्षण प्राप्त करिस। जेखर बाद ओ ह महिला मेट के रुप म काम करे लगिस।
ये डिजिटल युग म अब मनरेगा योजना म मजूदर मन के उपस्थिति ऑनलाइन मोबाइल मॉनिटरिंग एप्प के माध्यम ले करे जात हे ताकि बेरा म मॉनिटरिंग हो सकय संगेच समय म मजदूरी भुगतान हो सकय। अइसन म विकास ले पिछड़े क्षेत्र मन म पढ़े-लिखे महिला मन के कमी हे। ते म अनिता ह ऑनलाईन काम मन ल करे म उत्साह देखाइस अऊ वोला बीएफटी घासी कोति ले मोबाइल मॉनिटरिंग के काम मन ल सिखाए गीस। जेन ल अनिता ह बड़ कुशलता के संग सीखिस अउ जल्दीच ये म काम चालू कर दीस। ये अनिता के लगन के ही परिणाम हे कि अभी हाल म पूरा जिला म सबले जादा मोबाइल मॉनिटरिंग अनिता ही ह करत हे। जिला म ओखर समान मस्टर रोल निर्माण अउ काम मन के निष्पादन म कोनो वोखर आसपास तक नइ हे। अनिता वैध ह मनेरगा योजना मोबाइल मॉनिटरिंग के माध्यम ले भारत सरकार के डिजिटल मॉनिटरिंग के बेहतर उदाहरण प्रस्तुत करे हे। ओखर काम कुशलता ल देखके आस-पास के मनखे मन वोला डिजिटल इंडिया के बेटी कथें। वो ह अब तक देहे गए 287 के लक्ष्य म ले 215 मस्टर रोल के निर्माण नेटवर्क के समस्या के बावजूद घलोक पूरा करे हे। जेन कि लक्ष्य के 74.91 प्रतिशत हे।
अनिता ह बताइस कि ओ ल सुरू ले ही चुनौति पसंद रहिस। मनरेगा ले जुड़े के बाद ओ ल क्षेत्र के मनखे मन म डिजिटल काम के प्रति जागरूकता के अभाव के संबंध म पता चलिस। अनिता कथे के मोर मन म हमेशा ले ही नवा तकनीक अउ डिजिटल काम मन के प्रति लगाव रहिस। अइसन म अवसर मिले म मोर कोति ले काम म अपन श्रेष्ठ करे के प्रयास करे गीस। जेखर से मैं अपन क्षेत्र के विकास बर घलोक कुछ कर पात हंव। जेन मोला अऊ प्रोत्साहन देथे।