कार ले डेढ़ लाख के गांजा जब्त,अंर्तराज्यीय गिरोह के सदस्य गिरफ्तार

आरंग,17 दिसम्बर 2020। पुलिस ह अवैध नशा के कारोबार के खिलाफ बड़का कार्रवाई करत हुए एक कार ले अवैध रूप ले गांजा के परिवहन करइया अंर्तराज्यीय गिरोह के सदस्य ल गिरफ्तार करके लगभग डेढ़ लाख रूपिया के गांजा जब्त करे हे। आरंग थाना प्रभारी लेखधर दीवान ह बतइन कि रायपुर एसएसपी अजय यादव, एएसपी ग्रामीण तारकेश्वर पटेल अऊ सीएसपी एलसी मोहिले के मार्गदर्शन म स्थानीय पुलिस सरलग क्षेत्र म अवैध नशा के कारोबार करइया के खिलाफ सरलग कार्रवाई करत हे। इही क्रम म बुधवार के मुखबिर के सूचना म आरंग-राजिम रोड म रेलवे क्रासिंग के पास एक महाराष्ट्र पासिंग के स्विफ्ट कार क्रमांक एमएच 03 जेड 8319 ल जांच बर रोके गिस। जांच के दौरान कार ले 11 पैकेट म रखे 28 किलो 500 ग्राम गांजा बरामद करे गिस। मामला म पुलिस ह सोनपुर जिला छपरा बिहार निवासी कार चालक प्रभात सिंह पिता जयप्रकाश सिंह (25) ल हिरासत म लेके पूछताछ करिन। पुलिस ह बतइन कि आरोपी प्रभात धमतरी ले उत्तर प्रदेश म चित्रकूट म गांजा खपाए बर ले जावत रिहिस। एखर पहली घलो वो गांजा के परिवहन कर चुके हे। मुखबिर के सूचना के बाद बुधवार के एएसआई सोनप्रताप राजेत्री, प्रधान आरक्षक रेखलाल भारती के नेतृत्व म आरक्षक बंशी साहू, ओमप्रकाश शर्मा, राकेश सिंह, रामचरण ध्रुव, रमेश कोर्राम अऊ विजय साहू के टीम बनाके कार्रवाई करिन। आरंग पुलिस बरामद गांजा ल जब्त करके आरोपी प्रभात सिंह के खिलाफ नारकोटिक्स एक्ट के धारा 20 बी के तहत कार्रवाई करत हे।