रायपुर, वन नेशन वन राशन कार्ड व्यवस्था लागू होए के बाद अब कोनो राशन दुकान ले रासन लेहे जा सकत हे। एखर से मजदूरी करे खातिर राज्य म या राज्य के बाहिर आन जगा कमाए-खाए जवईया मनखे मन ल बड़ सहूलियत होवत हे। पहिली ए मजदूर मन ल राशन लेहे बर अपन गांव के राशन दुकान जाना परत रहिस। मुख्यमंत्री श्री भूपेश बघेल के पहल म प्रदेश म लागू करे जात ये नवा व्यवस्था के तहत राज्य के जम्मो राशनकार्ड धारी मन ल आधार कार्ड प्रमाणीकरण करके बायोमेट्रिक प्रणाली ले जोड़े जात हे। एखर बाद राशन उपभोक्ता मन ल कोनो राशन दुकान ले राशन उठाए के सुविधा मिलही।
वन नेशन वन राशन कार्ड के व्यवस्था प्रदेश के सबो जिला मन म लागू करे जात हे। एखर बर राज्य सरकार ह चरणबद्ध ढंग ले राशन दुकान मन म आधार कार्ड के संग उपभोक्ता के सत्यापन बर राशन दुकान मन म ई-पॉस मशीन लगाए जात हे। रायपुर जिला म ये नवा व्यवस्था के क्रियान्वयन शुरू हो गए हे। रोजी रोटी के तलाश म आन जिला ले आए मजदूर परिवार मन ल एकर लाभ मिलना घलोक शुरू हो गए हे। ग्राम पलौद म अइसन एक महिला श्रीमती पूर्णिमा बंजारे हे। जेला ये सुविधा के लाभ मिलत हे।
श्रीमती पूर्णिमा बंजारे अऊ ओखर परिवार बेहतर रोजगार के सिलसिला म धमतरी ले रायपुर आए हे। ये परिवार मूलतः धमतरी जिला के ग्राम शंकरदाह, ग्राम पंचायत हरफ्तराई के रहइया ये। अभी हाल म ये परिवार आरंग विकास खंड ग्राम पलौद म मजदूरी करके गुजर बसर करत हे। पूर्णिमा बंजारे के पति रूस्तम बंजारे ह मुख्यमंत्री अऊ मुख्य सचिव ल 04 दिसम्बर 2021 के चिट्ठी भेज के राशन उठाए म आवत दिक्कत के संबंध म अवगत करात ओ मन ल ऊंखर काम के जगा के तीर-तखार के उचित मूल्य के दुकान के माध्यम ले राशन देहे के अिलौली करे रहिन।
राज्य के मुख्य सचिव श्री अमिताभ जैन ह श्री बंजारे के आवेदन ल संज्ञान म लेत खाद्य विभाग के अधिकारी मन ल तुरंते ओ ल राशन देहे बर जरूरी कार्रवाई करे के निर्देश देहे रहिन। मुख्य सचिव के हुकुम के बाद रूस्तम बंजारे ल ई-पॉस के माध्यम ले आधार प्रमाणीकरण ले अभी हाल निवास स्थान पलौद के उचित मूल्य दुकान ले राशन वितरण शुरू हो गए हे। ये परिवार ह महिना जनवरी 2022 के राशन उठाए हे। श्रीमती बंजारे के परिवार ह राशन उठाव के व्यवस्था ऊंखर काम के जगा म कराए बर मुख्यमंत्री ल धन्यवाद देवत राज्य सरकार के प्रति आभार व्यक्त करे हे।
श्रीमती बंजारे के बताती कि ओ मन ल हर महीना पीडीएस के राशन लेहे बर मजदूरी ले दू दिन के छुट्टी लेके 200 किलो मीटर दूर धमतरी जिला के हरफ्तराई ग्राम जाना परत रहिस जेखर से मजदूरी अऊ पइसा दुनों के नुकसान होत रहिस। ये नवा व्यवस्था ले ओ मन ल अब अपन गांव जाय के जरूरत नइ हे। ओ मन ल नवा व्यवस्था ले काफी सुविधा मिले हे। जानबा हे कि नवा व्यवस्था ले अइसन मनखे जेमन ल काम-काज के सिलसिला म आन जगा जाना परथे ओ मन ल अब अपन राशन बर चिंता नइ करे ल परय। आन राज्य मन म घलोक मनखे अब अपन राशन उठा सकहीं।
ये नवा व्यवस्था के तहत कोकड़ी, जिला गोंदिया महाराष्ट्र के प्राथमिक राशनकार्डधारी श्रीमती पार्वती पति जनकदास जंदामल ह घलोक शासकीय उचित मूल्य के दुकान तिरपानगढ़ विकासखंड छुरिया जिला राजनांदगांव छत्तीसगढ़ ले राशन मिलत हे। श्रीमती पार्वती ल पात्रता अनुसार 15 किलो चावल के वितरण करे जात हे। अइसनहे बायोमेट्रिक प्रणाली ले राशन प्राप्त करना आसान हो गए हे। वन नेशन वन राशन कार्ड के ये नवा व्यवस्था म राज्य म ई-पॉस के माध्यम ले पीडीएस के राशन सामान वितरण ले अब राज्य के कोनो राशनकार्डधारी या आन राज्य के राशनकार्डधारी छत्तीसगढ़ के कोनो जिला के उचित मूल्य दुकान ले अपन सुविधानुसार अपन राशन के उठाव कर सकत हें।
छत्तीसगढ़ म वन नेशन वन कार्ड व्यवस्था के लाभ मिलना शुरू
