गरीब परिवार मन बर निःशुल्क खाद्यान्न तीन महिना अऊ बढ़ाए के अनुरोध
प्रवासी श्रमिक मन ल जुलाई म घलोक निःशुल्क चावल देहे के आग्रह
केन्द्रीय मंत्री श्री पासवान ह कहिन छत्तीसगढ़ के पीडीएस सिसटम देश म अव्वल
वीडियो कॉन्फ्रेंसिंग ले आयोजित बैठक म सामिल होइन मंत्री श्री भगत
रायपुर, 18 जून 2020। खाद्य मंत्री श्री अमरजीत भगत ह आज वीडियो कॉन्फ्रेंसिंग के माध्यम ले केन्द्रीय खाद्य मंत्री श्री रामविलास पासवान ले होए चर्चा के बेरा म कहिन के छत्तीसगढ़ राज्य म वन नेशन वन राशनकार्ड योजना आगामी अगस्त महिना ले शुरू करे जाही। उमन केन्द्रीय खाद्य मंत्री ले राज्य के बीपीएल परिवार मन ल जुलाई ले सितमबर तक कुल तीन महिना के खाद्यान्न निःशुल्क प्रदाय करे बर छत्तीसगढ़ ल आबंटन देहे के आग्रह करे हें। खाद्य मंत्री ह केन्द्रीय मंत्री ले प्रवासी श्रमिक मन ल घलोक जुलाई महिना म निःशुल्क खाद्यान्न प्रदान करे के अनुरोध करे हें। खाद्य मंत्री ह बताइस के अभी हाल म छत्तीसगढ़ के प्रवासी श्रमिक मन ल मई अउ जून महिना के निःशुल्क खाद्यान्न देहे जात हे। केन्द्रीय खाद्य मंत्री श्री रामविलास पासवान ह छत्तीसगढ़ राज्य म सार्वजनिक वितरण प्रणाली के पारदर्शिता के सराहना करिन। उमन कहिन के छत्तीसगढ़ के पीडीएस सिसटम पूरा देश म अव्वल अउ अनुकरणीय हे। केन्द्रीय खाद्य मंत्री ह बताइस के प्रधानमंत्री गरीब कल्याण योजना के तहत अवइया तीन महीना बर निःशुल्क खाद्यान्न आबंटन अउ प्रवासी श्रमिक मन ल जुलाई म घलोक निःशुल्क खाद्यान्न देहे के प्रस्ताव विचाराधीन हे। श्री पासवान ह हर संभव सहयोग के भरोसा देवाए हें।