रायपुर, 02 जुलाई 2024। स्कूल शिक्षा विभाग के सचिव श्री सिद्धार्थ कोमल परदेशी ह आज रायपुर जिला के आरंग विकासखंड के ग्राम राखी के पंचायत प्रतिनिधि अउ छात्र-छात्रा मन के संग 150 ले जादा छायादार पौधा मन के रोपण करिन। पौधारोपण ले पहिली सचिव ह सबो छात्र-छात्रा मन अउ पालक मन ल किरिया खवाईन के हमर लगाये पौधा के वृक्ष बनत तक पालन-पोषण करबो अउ उंखर सुरक्षा घलोक करबो।
मुख्यमंत्री श्री विष्णु देव साय के निर्देश म ’एक पेड़ माँ के नाम’ ए थीम म पूरा राज्य के स्कूल म पौधारोपण करे के अभियान चलाए जात हे। ए आशय के चिट्ठी कालेच राज्य शासन ह सबो कलेक्टर मन ल भेजे हे। ’एक पेड़ माँ के नाम’ पौधारोपण अभियान के शुरुवात जिला रायपुर, वि.खं. आरंग के शासकीय उच्चतर माध्यमिक विद्यालय राखी ले करे गीस।
सचिव श्री परदेशी ह छात्र मन ल प्रेरित करत बताइन कि पर्यावरण ल संतुलित बनाये रखे म पेड़ पौधा मन के बड़का योगदान होथे। उमन कहिन कि अपन परिजन के सुरता म पौध रोपण करव। पेड़ पौधा के सेती वातावरण शुद्ध अऊ तापमान नियंत्रित रहिथे। पेड़ पौधा म ही हमार जीवन के भविष्य निर्भर हे। उमन लइका मन ले कहिन कि ओ मन खुद तो पौधा लगाहीं संगेच अपन परिवार के सदस्य अउ दोस्त मन ल घलोक पौधा लगाय बर प्रेरित करे ल कहिन। उमन उपस्थित सरपंच श्रीमती गायत्री साहू, उपसरपंच श्री पोषण पटेल अउ गांव वाले मन ले घलोक पौधा लगाय अउ उंखर सुरक्षा करे के अपील करिन।
शिक्षा विभाग के संचालक श्रीमती दिव्या मिश्रा ह कहिन कि हमला जन्मदिन, वैवाहिक वर्षगांठ आदि अवसर ल यादगार बनाए बर पौधा गिफ्ट करना चाही अऊ पौधा लगाना चाही। आज राखी विद्यालय परिसर म नीम, गुलमोहर, अशोक, अर्जुन, आम, पीपल आदि के 150 ले जादा पौधा रोपे गीस अऊ उंखर सुरक्षा के दायित्व स्कूली छात्र-छात्रा मन ल सौंपे गीस। ए अवसर म पर्यावरण प्रेमी डॉ. पदम जैन, उप सचिव श्रीमती फरिहा आलम, अवर सचिव श्री आर.पी. वर्मा अउ स्कूल शिक्षा विभाग के अपर संचालक श्री योगेश शिवहरे, संयुक्त संचालक श्री आशुतोष चावरे, उप संचालक श्री अशोक बंजारा, सर्वश्री करमन खटकर, महेश नायक, प्रवीण श्रीवास्तव, लव कुमार, आर. के. त्रिपाठी, संस्था के प्राचार्य श्रीमती चंचल परदेशी संग जनप्रतिनिधि, गणमान्य नागरिक उपस्थित रहिन।
