नवा साल म मुख्यमंत्री ह प्रदेशवासी मन ल दीन एक अऊ सौगात: अब एक सेकेण्ड म जारी होही भवन अनुज्ञा

रायपुर, छत्तीसगढ़ के मुख्यमंत्री श्री भूपेश बघेल ह आज इहां अपन निवास कर्यालय म आयोजित कार्यक्रम म नगरीय क्षेत्र मन म 500 वर्गमीटर (5382 वर्ग फीट) तक के आवासीय प्लाट्स म भवन निर्माण बर मानव हस्तक्षेप रहित ऑनलाईन डायरेक्ट भवन अनुज्ञा सिसटम के शुरुआत करिन।
मुख्यमंत्री श्री भूपेश बघेल ह ये बेरा म कहिन कि गांव अऊ शहर के विकास बर हमन लगातार 3 बछर तक काम करे हन, ये सूची म एक अऊ सुविधा जोड़त हे जेखर से राज्य के शहर के विकास म तेजी आही अऊ नागरिक मन ल एक बड़का समस्या के प्रभावी समाधान मिलही। राज्य के नागरिक जेन अपन घर बनाना चाहथें ऊंखर बर भवन अनुज्ञा एक अहम प्रक्रिया हे, फेर ये प्रक्रिया अतका आसान नइ रहिस नागरिक मन ल ये सुविधा प्राप्ति बर काफी परेशानी होवत रहिस। काबर के ये प्रकिया पूरा होए म लंबा समय लगत रहिन नक्शा पास कराए बर ये प्रकिया कई अधिकारी मन तक पहुंचत रहिस अऊ ओखर बाद नागरिक ल घर बनाए बर भवन अनुज्ञा मिलत रहिस। फेर अब ये प्रकिया सब मानव हस्तक्षेप रहित होही अऊ जल्दी ले जल्दी ले पूरा होही। यदि आप मन के पास सबो कागद हे त अब आप मन ल अपन घर बनाए बर कहूं चक्कर लगाय के जरूरत नइ हे। घर बनाए बर नागरिक मन ल एखर से बड़े सुविधा अऊ कहां मिलही।
मुख्यमंत्री ह कहिन कि नागरिक मन के समस्या ल देखत उंखर समाधान बर मैं ह 15 दिन पहिली अधिकारी मन ल निर्देश दे रहेंव अऊ विभाग ह 15 दिन के भीतर ही काम ल पूरा कर लीस। ये काम बर सबो बधाई के पात्र हे। संगेच नागरिक मन ल घलोक मैं बधाई देवत हंव कि ऊंखर घर बनाए के काम घलोक अब जल्दी पूरा हो सकही। मुख्यमंत्री ह ये बेरा म ये प्रणाली के पहिली भवन अनुज्ञा रायपुर के दलदलसिवनी निवासी आवेदक श्रीमती चेतन देव साहू ल प्रदान करिन।