मुख्यमंत्री ह राज्योत्सव के अवसर म स्लम स्वास्थ्य योजना के ऑनलाईन डैशबोर्ड

रायपुर, मुख्यमंत्री श्री भूपेश बघेल ह आज राज्य स्थापना दिवस के अवसर म मुख्यमंत्री स्लम स्वास्थ्य योजना के ऑनलाईन डैशबोर्ड लॉच करिन। मुख्यमंत्री स्लम स्वास्थ्य योजना के ऑनलाईन डैशबोर्ड ले नागरिक घर बइठे ही मुफ्त म इलाज कराए बर आगू ले अपॉइनमेंट ले सकहीं। संगेच ये देख पाहीं के मोबाईल मेडिकल यूनिट के गाड़ी ऊंखर एरिया म कब अवइया हे। ये डैशबोर्ड ले अब इलाज अऊ आसान होही। ये डैशबोर्ड म मरीज मन के दवा पर्ची अऊ जांच रिपोट घलोक ऑनलाईन उपलब्‍ध होही। ये योजना के लाभ लेहे बर नागरिक मन ल ऑनलाईन डैशबोर्ड म पंजीयन कराना होही।
जानबा हे कि मुख्यमंत्री श्री भूपेश बघेल के विशेष पहल म एक साल पहिली 1 नवंबर 2020 के राज्य के स्लम क्षेत्र मन के नागरिक मन ल निःशुल्क अऊ बेहतर स्वास्थ्य सुविधा प्रदान करे के उद्देश्य ले मुख्यमंत्री स्लम स्वास्थ्य योजना के शुरुआत करे गए रहिस। ये योजना के तहत 14 नगर निगम क्षेत्र मन म 60 मोबाईल मेडिकल यूनिट मन के माध्यम ले जरूरतमंद मनखे मन ल ऊंखर मोहल्ला म ही इलाज के सुविधा प्रदान करे जात हे। मात्र एक साल म मुख्यमंत्री स्लम स्वास्थ्य योजना के संग 11 लाख ले जादा नागरिक मन के मुफ़्त म उपचार करके ओ मन ल स्वास्थ लाभ देहे जा चुके हे। मोबाईल मेडिकल यूनिट कोति ले एक साल म 16 हजार 700 कैम्प आयोजित करे गए हे।
नगरीय प्रशासन विभाग के सचिव श्रीमती अलरमेलमंगई डी ह ये बेरा म बताइस कि मुख्यमंत्री स्लम स्वास्थ्य योजना ल नागरिक मन बर अऊ जादा सुगम बनाए के उद्देश्य ले स्लम स्वास्थ्य योजना के डैशबोर्ड लांच करे जात हे।