- कक्षा आठवीं के छात्रा ले मुख्यमंत्री ह करिन ऑनलाईन बातचीत
- छात्रा ले कहिन अपन सबो संगवारी मन ल घलोक ये पोर्टल ले जोड़व
- अब शिक्षक कोनो एके स्कूल के न ही पूरा प्रदेश के छात्र मन ल दे सकही शिक्षा- श्री भूपेश बघेल
- ऑनलाईन इंटरएक्टिव कक्षा मन ले शिक्षक अऊ लइका अपन-अपन घर ले ही वीडियो कॉफ्रेंसिंग के माध्यम ले जुड़हीं देश म अपन तरा के पहिली बड़का ऑनलाईन एजुकेशन प्लेटफार्म
- छत्तीसगढ़ राज्य संग आन राज्य के हिन्दी भाषी छात्र मन बर घलोक होही लाभदायक
- स्कूल शिक्षा विभाग के पढ़ईया लईका मन के हित म अभिनव पहल: लॉकडाउन के बाद घलोक पोर्टल के होही उपयोग
- छत्तीसगढ़ के दूरस्थ अंचल मन अउ विसय शिक्षक मन के कमी वाले शाला मन बर महत्वपूर्ण
रायपुर 07 अपरेल 2020। मुख्यमंत्री श्री भूपेश बघेल ह स्कूली लइका मन ल घरे म रहि के पढ़े बर देश के सबले बड़े ऑनलाईन पोर्टल म ले एक पढ़ई तुंहर दुआर के आज अपन निवास कार्यालय म शुभारंभ करिन। ये पोर्टल के संग लाखों छात्र बिना कोनो शुल्क के ऑनलाईन पढ़ाई कर सकहीं। मुख्यमंत्री श्री बघेल ह कहिन कि लॉकडाउन के संगेच अवइया बेरा म लइका मन के सरलग पढ़ई म ये कार्यक्रम बहुत उपयोगी साबित होही। मुख्यमंत्री ह ऑनलाईन पोर्टल के शुभारंभ करत तिल्दा (जिला-रायपुर) के शाला के कक्षा आठवीं के स्कूली छात्रा दामिनी अऊ दुर्ग जिला के पाटन विकासखण्ड के सेलूद प्राथमिक शाला के शिक्षक श्री मिलिंद ले ऑनलाईन बातचीत घलोक करिन अऊ ये पोर्टल बर स्कूल शिक्षा विभाग के टीम ल बधाई दीन। ये बेरा म स्कूल शिक्षा मंत्री डॉ. प्रेमसाय सिंह टेकाम, स्कूल शिक्षा विभाग के प्रमुख सचिव डॉ. आलोक शुक्ला, संचालक लोक शिक्षण संस्थान श्री जितेन्द्र कुमार शुक्ला उपस्थित रहिन।
