राजनांदगांव, 27 जुलाई 2020। मुख्यमंत्री श्री भूपेश बघेल के मंशा के मुताबिक वनवासी मन ल वन अधिकार पट्टा प्रदान करके मालिकाना हक देवा के स्वावलंबी बनाए के दिशा म सुग्घर उदीम करे जात हे। इही कड़ी म म प्रदेश के मुखिया के सपना ल श्री मिश्राराम राणा साकार करत हे। श्री राणा राजनांदगांव जिला के वनांचल मोहला विकासखंड अंतर्गत ग्राम मुदियाल म मिले वन अधिकार जमीन म धान के खेती संग अपन बाड़ी म सब्जी, फल अऊ फूल के बगियाँ गुलजार करत हे।
जानबा हे के राजनांदगांव जिला के श्री राणा ल राज्य शासन ह 2 एकड़ 76 डिसमिल जमीन के वन अधिकार पट्टा देहे हे जेखर बर वो ह मुख्यमंत्री श्री भूपेश बघेल के आभार व्यक्त करत कहिस के अब अनिश्चितता के बादल छट गे हे। अब मोर अपन खेत म धान के बाली के संगे संग बाड़ी म फल अऊ रंग-बिरंगा फूल के बगियां घलोक गुलजार होही। वो कहिस के राज्य शासन के मंशा के मुताबिक शासन कोति ले संचालित योजना मन ले जिहां वनवासि मन के जीवन म आर्थिक रूप ले समृद्धि आए हे, उहें ओ मन वनोपज संग्रहण, मुर्गी पालन, पशुपालन के संग खेती-बाड़ी करके आर्थिक रूप ले सुदृढ़ होवत हें। कृषक श्री मिश्राराम राणा के फूल के बगिया म सुंदर जंगली गुलाब अउ गेंदा के फूल के क्यारी हे। संगे म अमरूद, केला पपीता अउ आन फलदार वृक्ष घलोक हे। उहें वोखर बाड़ी म बैगन, कद्दू, मिर्च, करेला, बरबट्टी आदि सब्जी संग कई प्रकार के भाजी तको लहलहावत हे जेन वोखर सफलता के कहानी खुदे बतावत हे।
