रायपुर, मुख्यमंत्री श्री भूपेश बघेल ह आज इहां सायाजी होटल म आयोजित कार्यक्रम म उत्कृष्ट शैक्षणिक संस्था, अनुसंधानकर्ता, नवाचार करइया अऊ प्राध्यापक मन ल ऑरोपाथ ग्लोबल अवार्ड 2019 ले सम्मानित करिस। ये अवार्ड ऑरोपाथ सर्विस ट्रस्ट अऊ श्री अरविंदो सोसाइटी कोति ले शैक्षणिक संस्था मन म उच्च शिक्षा म गुणवत्ता के सुधार, पढ़ईया लईका मन के रोजगार दक्षता बढ़ाके ओ मन ल भावी जीवन बर तियार करे अऊ अध्ययन-अध्यापन म नवाचार के माध्यम ले उत्कृष्टता हासिल करे के उदीम मन ल बढ़ावा देहे बर देहे जाथे। मुख्यमंत्री ह कार्यक्रम म 15 श्रेणी मन म ग्लोबल अवार्ड बांटिन। उच्च शिक्षा मंत्री श्री उमेश पटेल विशेष अतिथि के रूप म कार्यक्रम म उपस्थित रहिन ।
मुख्यमंत्री श्री बघेल ह कार्यक्रम ल संबोधित करत कहिन कि आज सबले बड़े जरूरत उच्च शिक्षा म गुणवत्ता सुनिश्चित करे के अऊ उच्च शिक्षा ल सही जरूरत ले जोड़े के हे। शिक्षा के माध्यम ले युवा मन के दृष्टिकोण ल व्यापक करे के घलोक जरूरत हे। मुख्यमंत्री ह महर्षि अरविंद योगी के सुरता करत कहिन कि ओ मन एक क्रांतिकारी रहिन, ऊंखर जीवन के एक घटना ह ओ मन ल आध्यात्मिकता के तरफ मोड़ दीस। उमन लंबा समय तक आध्यात्मिक साधना करिन। महर्षि अरविंदो ह अध्यात्मिक ले मानसिक उच्च स्तर ल प्राप्त करिन। मुख्यमंत्री ह कहिन कि मानव सेवा हमर लक्ष्य होना चाही। हमला अपन शक्ति मन ल पहिचान करके समाज, राज्य अऊ देश के नवनिर्माण म योगदान देना चाही। ये बेरा म मुख्यमंत्री के सलाहकार श्री राजेश तिवारी, ऑरोपाथ के श्री समरेंद्र घोष, डॉ. इन्द्राणी, श्रीमती स्मृति अऊ सुश्री शुभांगी अऊ उपस्थित रहिन।
