- छत्तीसगढ़ बर कुपोषण अऊ एनीमिया नक्सलवाद ले बड़े चुनौती
- श्री भूपेश बघेल चेन्नई म आयोजित थिंक एडू कॉन्क्लेव 2020 म सामिल होइन
- राज्य म शिक्षा के क्षेत्र म होए सुधार मन के दीन जानकारी
रायपुर, 08 जनवरी 2020। मुख्यमंत्री श्री भूपेश बघेल ह कहिन हे कि हमर लक्ष्य गगनचुंबी इमारत अऊ हवाई अड्डा के निर्माण करना नइ हे, भलुक छत्तीसगढ़ म रहइया मनखे मन उपर ध्यान केंद्रित करना हे। श्री बघेल आज चेन्नई म द न्यू इंडियन एक्सप्रेस – थिंक एडु कॉन्क्लेव 2020 के श्रोता मन ल संबोधित करत रहिन। मुख्यमंत्री ह राज्य के वो कार्यक्रम मन के बारे म घलोक बताइन जऊन उंखर एक बछर के सरकार ह राज्य के विकास ल बढ़ावा देहे बर अपनाए हे। श्री बघेल ह कहिन कि हमार राज्य म किसान मन ल धान के पूरा देश म सबले जादा कीमत मिलत हे। जब ले हमर सरकार सत्ता म आए हे, हमन किसान मन के करजा माफी करे हन अऊ ओ मन ल बिजली बिल म छूट घलो दिए हन। उमन कहिन कि सिरिफ एक साले च म ऑटोमोबाइल, जवाहरात अऊ रियल एस्टेट सेक्टर म हमर राज्य के वृद्धि प्रभावशाली रहे हे।
श्री बघेल ह कहिन कि 39 प्रतिशत आबादी अभी तह गरीबी रेखा ले नीचे हे। हमार लइका मन के एक बड़का हिस्सा कुपोषित हे। हमर प्रदेश के कई महिला मन एनेमिक हे। अऊ ये समस्या नक्सलवाद ले घलोक बड़े हे। हर समस्या के हल हे। उमन कहिन कि छत्तीसगढ़ के गरीब अऊ कुपोषित लइका मन ल गर्म पौष्टिक भोजन देहे जात हे। नक्सल प्रभावित बस्तर जिला म हमन 200 अइसन स्कूल फेर खोल दे हन, जऊन पहिली नक्सली मन बंद कर देहे रहिन। नक्सल गतिविधि मन के कारण ये क्षेत्र म शिक्षा के बहुत नुकसान होय रहिस। उमन कहिन कि जगारगुंडा अऊ भेज्जी म स्कूल मन ल 13 साल बाद फेर खोल देहे गीस। स्कूल मन ल घलोक फेर से तियार करे गीस अऊ उहां लइका मन के बेहतर शिक्षा के व्यवस्था करे गीस।
मुख्यमंत्री ह कहिन कि हमार तिर 55,000 सरकारी स्कूल हे जिहां 65 लाख छात्र पढ़त हें। हमन हालेच म पैरा शिक्षक मन अऊ स्वयंसेवी शिक्षक मन के संग काम करेन अऊ ओ मन ल सरकारी तंत्र म सामिल कर लेन। 1.5 लाख ले जादा शिक्षक अब स्थायी शिक्षक बन गए हें। ये साल 15,000 नवा शिक्षक मन के भर्ती करे गए रहिस। उमन कहिन कि 2014 के नेशनल अचीवमेंट सर्वे ह सबो राज्य मन अऊ केंद्र शासित प्रदेश मन के बीच हमार राज्य ल 34 वां स्थान म रखे हे। हमार पास तभो ले, ये साल हमर रैंक म सुधार होय हे अऊ ये 19 वां स्थान म हे। श्री बघेल ह शिक्षा क्षेत्र म उंखर सरकार कोति ले करे गए सुधार मन के बारे म घलोक बात करिन। उमन कहिन कि हमर ध्यान शिक्षा के माध्यम ले विकास म हे। सरकार ह कक्षा शिक्षण शैली मन म घलोक सुधार करे हे। हमन एक अइसन प्रणाली ल अपनाए हन जऊन व्यक्तिगत सीखे उपर ध्यान केंद्रित करथे। ए बेरा म सामुदायिक भागीदारी के गुंजाइश हे। हमन स्कूली छात्र मन बर मोबाइल ऐप घलोक विकसित करे हन।
उमन कहिन कि नक्सलवाद निश्चित रूप ले एक अइसन मुद्दा हे जऊन ल कोनो छत्तीसगढ़ के बात करत अनदेखा नइ कर सकय। हम हिंसा के संग हिंसा ल हल नइ कर सकन। ये एक रणनीति हे जेखर सरकार मन ह कई बछर ले पालन करत हे। तभो ले, हम एखर बजाय सबो हितधारक मन के संग चर्चा अऊ बातचीत कर सके हन, ये आगू के रद्दा हे।
