छत्तीसगढ़ ल राष्ट्रीय स्तर म फेर मिलीस उपलब्धि
छत्तीसगढ़ बायोफ्यूल विकास प्राधिकरण ल इंडिया ‘‘ग्रीन एनर्जी अवार्ड 2024‘‘ ले नवाजे गीस
मुख्यमंत्री श्री साय ह उपलब्धि बर दीन बधाई अऊ शुभकामना
रायपुर, 23 फरवरी 2024। छत्तीसगढ़ ह राष्ट्रीय स्तर म फेर उपलब्धि हासिल करे हे। इंडियन फेडरेशन ऑफ ग्रीन एनर्जी, नई दिल्ली कोति ले छत्तीसगढ़ के ऊर्जा विभाग के अंतर्गत छत्तीसगढ़ बायोफ्यूल विकास प्राधिकरण (सीबीडीए) ल ‘‘इंडिया ग्रीन एनर्जी अवार्ड, 2024‘‘ ले नवाजे गए हे। छत्तीसगढ़ बायोफ्यूल विकास प्राधिकरण राष्ट्रीय स्तर म ‘‘आउटस्टैण्डिंग कम्यूनिटी बेस्ड ग्रीन एनर्जी प्रोजेक्ट‘‘ श्रेणी म विजेता बने हे। मुख्यमंत्री श्री विष्णु देव साय ह ए उपलब्धि बर छत्तीसगढ़ बायोफ्यूल विकास प्राधिकरण ल बधाई अऊ शुभकामना देहे हे।
केन्द्रीय सड़क परिवहन अऊ राजमार्ग मंत्री श्री नितीन गड़करी ह 21 फरवरी के नई दिल्ली म ये पुरस्कार सीबीडीए के मुख्य कार्यपालन अधिकारी श्री सुमित सरकार ल प्रदान करीस। कार्यक्रम म केन्द्रीय पेट्रोलियम अउ प्राकृतिक गैस राज्य मंत्री श्री रामेश्वर तेली घलोक उपस्थित रहिन।
जानबा हे कि छत्तीसगढ़ बायोफ्यूल विकास प्राधिकरण कोति ले पाछू एक दशक ले घलोक जादा समय ले जैव ईंधन अउ जैव ऊर्जा के क्षेत्र म ग्रामीण किसान अऊ हितग्राही मन ल जोड़के उल्लेखनीय काम करे गए हे। छत्तीसगढ़ बायोफ्यूल विकास प्राधिकरण कोति ले बायोडीजल, बायो-एथेनॉल, बायोजेट एवीयेशन फ्यूल, जैव-सीएनजी, बायोगैस ले बिजली उत्पादन अऊ ग्रिड म समायोजन जइसे कई सफल अनुसंधान अउ विकास काम करे गए हे। प्राधिकरण ल अपन सफल प्रयोग ले राज्य अउ राष्ट्रीय स्तर म मिले उपलब्धि मन ल देखत ‘‘इंडिया ग्रीन एनर्जी अवार्ड, 2024‘‘ पुरस्कार देहे गए हे।
