राष्ट्रीय आदिवासी नृत्य महोत्सव : छत्तीसगढ़ के स्वागत ले अभिभूत होइन मालदीव के जनजाति कलाकार

रायपुर, राष्ट्रीय आदिवासी नृत्य महोत्सव म भाग लेहे छत्तीसगढ़ के राजधानी रायपुर पहुंचे मालदीव के जनजाति कलाकार इहां होए ऊंखर स्वागत-सत्कार ले प्रभावित होइन। नृत्य दल के सियान श्री भास्कर भोसले ह बताइस कि ओ मन एक छोटे से देश के रहइया यें। उहां के राजधानी माले मात्र छै किलोमीटर म बसे हे। ओ मन ल बहुत प्रसन्नता हे कि भारत के छत्तीसगढ़ राज्य म ओ मन ल नृत्य के प्रदर्शन के अवसर मिलत हे। ओ मन एखर से पहिली हरियाणा राज्य के सूरजपुर कुंभ म घलोक प्रदर्शन करे हें। उमन मूलतः ड्रम (ढोल) के रिदम म नृत्य करथें। ऊंखर नृत्य के मुख्य वाद्य यंत्र कई प्रकार के ढोल हे। ऊंखर दल म गायक घलोक सामिल हे। ओ मन राष्ट्रीय आदिवासी नृत्य महोत्सव म तीनों दिन बाबूरी, नाल, थीम बेरो, टाकिला बाग, खासीमाजा, लांगीरी अऊ गाउड़ी नृत्य के प्रदर्शन करहीं।