ऑक्सीजोन निर्माण अऊ अपशिष्ट निपटान प्रणाली ह शुद्ध वातावरण के संग दीस आजीविका के साधन

रायपुर, 25 अगस्त 2021। राज्य के धमतरी जिला के मगरलोड ब्लॉक के ग्राम पंचायत करेलीबड़ी के आश्रित ग्राम खट्टी म महिला संगठन के उदीम ले न केवल वृक्षारोपण ले ऑक्सीजोन के निर्माण करे गए हे, भलुक एखर से ओ मन ल आजीविका के स्थायी साधन घलोक मिल गए हे। उहें जिला के ग्राम भेण्ड्री म ठोस अपशिष्ट पदार्थ प्रबंधन ले ग्रीन आर्मी के ए महिला मन ल अकतहा आय घलोक मिलत हे।
ग्राम खट्टी म अभी दूरिहा तक हरियाली ही हरियाली नजर आत हे। कोनो समय म सिरिफ चराई के काम अवइया जमीन म अब अलग-अलग किसिम के साग-भाजी के खेती लहलहावत हे। महानदी करार ले लगे करीबन 2 एकड़ भूंइया म ऑक्सीजोन निर्माण बर स्वीकृति जिला पंचायत ह देहे रहिस, जेन ल तीन साल के लीज म इहां के जय मां भवानी स्वसहायता समूह ल अनुबंधित करके ये काम देहे गीस। ये ऑक्सीजोन फरवरी 2021 म तियार हो गीस, जेमां 223 परिवार ल मनरेगा ले रोजगार मिलीस। समूह के महिला मन इहां हरदी, मिरचा अउ कई प्रकार के साग-भाजी के संग प्याज के खेती करत हेे। संगेच वृक्षारोपण के तहत जामुन, अमरूद, आंवला, कटहल के अलावा आन मौसमी फल के पौधा घलोक लगाए गए हे जेखर से ओ मन ल अकतहा आय मिलत हे।
अइसनहे मगरलोड के ग्राम भेण्ड्री म ठोस अपशिष्ट प्रबंधन ल महिला मन कमाई के जरिया बनावत हें। दैनिक उपयोग के बाद निकलइया कचरा ल अलग-अलग करके ग्रीन आर्मी के महिला मन ओखर संग्रहण करत हें। ठोस अपशिष्ट प्रबंधन बर साल 2020 म ही इहां स्वच्छ भारत मिशन ले अभिसरण करके शेड तियार करे गए हे, जेमां शेड तियार करे के संगें-संग चेनलिंक फेंसिंग अऊ पेवर ब्लॉक के काम करे गए हे। महिला मन ह घर ले निकले कचरा मन के अलावा एती-तेती बगरे कचरा मन के समुचित निपटान करत हें। प्लास्टिक उत्पाद वाले कचरा ल बेचके अऊ अपघटित होवइया कचरा ल नाडेप टांका म डालके खाद तियार करे के काम महिला मन ह करे हें। एला किसान मन ल बेचके ओ मन अकतहा आय घलोक अर्जित करत हें। शेड के बन जाय ले महिला मन एके जगा सकला के कचरा मन ल व्यवस्थित ढंग ले अलग करत हें। ये प्रकार समूह के महिला मन ल जिहां ठोस अपशिष्ट पदार्थ के प्रबंधन के समुचित जानकारी मिले हे, उहें ओ मन ल अब बारहमासी रोजगार घलोक मुहैया हो गए हे।