चुलहा फुंकईया पदमा राठिया बनिस सफल उद्यमी

रायगढ़, आज गांव के महिला मन केवल परिवार अऊ गृहस्थी तक ही सीमित नइ हे, उमन घलो अपन काम ले खुद के पहिचान बनाना चाहत हें, बस ओ मन ल बेरा अऊ पंदोली के अगोरा हे। अऊ इही बेरा अऊ पंदोली ओ मन ल शासन के योजना देवत हे। जेखर से ओ मन आज सालाना लाखों रूपिया के आय अर्जित करके सफल उद्यमी के रूप म अपन पहिचान बनावत हें। कुछ अइसनहेच बानगी श्रीमती पदमा राठिया के रूप म देखे ल मिलीस। जे ह शासन के योजना के लाभ लेके खुद के डीजे एण्ड साउण्ड सर्विस के व्यवसाय चालू करके अपन अऊ परिवार बर आर्थिक रूप ले संबल बन गे हे।
ग्राम चोटीगुढ़ा पोस्ट रायकेरा विकासखण्ड घरघोड़ा जिला रायगढ़ के एक गृहिणी महिला श्रीमती पदमा राठिया के मन म शुरू ले इच्छा रहिस कि घर-परिवार ल संभाले के बाद गांव म ही व्यवसाय स्थापित करके खुद के पहिचान के संग परिवार के सहयोग कर सकंव। इही बीच म ओ ल जानकारी मिलीस के छत्तीसगढ़ खादी ग्रामोद्योग, जिला पंचायत रायगढ़ कोति ले केन्द्र शासन के पीएमईजीपी योजना के तहत रोजगार मुखी कार्यक्रम चलाए जात हे। वो ह ये योजना के लाभ लेके खुद के व्यवसाय स्थापित करना चाहत रहिस। छत्तीसगढ़ खादी ग्रामोद्योग के संचालक ले उचित मार्गदर्शन अऊ सहयोग ले श्रीमती पदमा राठिया ऑनलाईन डीजे एण्ड साउण्ड सर्विस व्यवसाय बर साल 2019-20 म फार्म भरिस। सेन्ट्रल बैंक ऑफ इंडिया रायकेरा ले ओखर 5 लाख रूपिया के प्रकरण स्वीकृत होइस, जेमां नियमानुसार 35 प्रतिशत के आधार म 1 लाख 75 हजार रूपिया अनुदान मिलिस। आज डीजे एण्ड साउण्ड सर्विस व्यवसाय बढि़या चलत हे जेखर से ओ ल सालाना 5 लाख रूपिया तक आय होवत हे। वोखर ये व्यवसाय ले प्रत्यक्ष अऊ परोक्ष रूप ले आन मनखे मन ल घलोक रोजगार मिलत हे। वो बताथे कि ये व्यवसाय के संचालन ले वोखर आत्मविश्वास म वृद्धि होए हे अऊ वो आन महिला मन ल घलोक शासन के योजना मन के जानकारी देके स्वरोजगार बर प्रेरित करत हे।