बखत म सहायता ले मजबूत होही किसान अउ ग्रामीण अर्थव्यवस्था
कबीरधाम, होली के तिहार ए पईत किसान मन बर सिरिफ रंग के नोहे, बल्कि समृद्धि अउ खुसहाली के सउगात लेके आए हे। राज्य सरकार कोति ले समर्थन मूल्य म धान बेचइया किसान मन ल 3100 रूपया प्रति क्विंटल के दर ले अंतर रासि ल होली ले पहिली एकमुस्त देहे के निरनय ह गांव-गांव म उसाह के माहौल बना देहे हे। ए रासि ह किसान मन के जिनगी म आर्थिक राहत के संगे-संग आत्मविसवास घलो बढ़ावत हे।
कबीरधाम जिला के ग्राम खिरशाली के किसान श्री मूलचंदन पाटिल बर ए निरनय ह कोनो वरदान ले कम नोहे। ओ ह ए बछर धान खरीदी केंद्र म 31.20 क्विंटल धान बेचे रहिस, जेकर समर्थन मूल्य के रासि ओला बखत म बैंक खाता म मिल गे। अब अंतर रासि घलो होली ले पहिली मिले के खबर ले ओखर परिवार म खुसी के लहर दौड़ गे हे। श्री पाटिल ह बताथे के ए पईत खरीदी केंद्र म सबो काम सुग्घर अउ व्यवस्थित रहिस, जेखर ले ओला कोनो किसम के तकलीफ नइ होइस। ओह कहिथे के ए पईत ए पइसा ले ओ ह अपन लइका मन बर नवा कपड़ा, घर के जरूरी सामान अउ तिहार बर रंगगुलाल खरीद सकही।
ग्राम छांटा के किसान श्री भोलाराम चंद्रवंशी ह बताइन के ओह 5.57 एकड़ म धान अउ बाकी खेत म गन्ना के खेती करथे। ए सीजन म ओह 84.40 क्विंटल धान समर्थन मूल्य म बेचिस। ओह बताथे के बखत म भुगतान मिले ले ओला आर्थिक चिंता नइ रहिस अउ अब होली ले पहिली अंतर रासि मिले ले घर के जरूरी जरूरत पूरा करे के संगे-संग खेती-किसानी के काम म घलो सुबिधा होही। ओखर कहना हे के तिहार के बखत ए रासि मिलना परिवार बर बहुत बड़े राहत आय।
इही रकम ले ग्राम मोटियारी के किसान श्री मेलनराम जायसवाल ह घलो सरकार के ए निरनय म खुसी जताए हे। ओ ह ए बछर लगभग 212 क्विंटल धान समर्थन मूल्य म बेचे हे। असल भुगतान ओला पहिलीच मिल गे हे, फेर अंतर रासि होली ले पहिली मिले के घोसना ले ओखर आर्थिक योजना मन ल नवा बल मिले हे। ओखर कहना हे के होली के बाद खेती के नवा सीजन सुरू हो जाथे, अइसन म ए रासि ह पारिवारिक जरूरत के संगे-संग खेती के काम म बहुत उपयोगी साबित होही। ओ ह ए पइसा ले ट्रैक्टर ट्रॉली खरीदे के योजना बनावत हे, जेखर ले खेती के काम आसान होही अउ कमाय के नवा जरिया घलो बाढ़ही।
किसान मन कहिन के मुख्यमंत्री श्री विष्णुदेव साय के अगुवाई म लेहे गे ए निरनय ह उमन के जरूरत ल पूरा करथे। होली ले पहिली आर्थिक सहायता मिले ले न केवल तिहार के खुसी दुगुना हो गे हे, बल्कि ग्रामीण अर्थव्यवस्था ल घलो मजबूती मिलही। ए पहल ले बखत म मिले सहयोग ह किसान मन के जिनगी म बड़े बदलाव ला सकथे। एखर ले तिहार घलो खुसहाल, खेती घलो सशक्त अउ भविष्य घलो सुरक्षित होही।