उत्तर बस्तर कांकेर : धान के खेती के बलदा सब्जी के खेती म चार गुना जादा लाभ

उत्तर बस्तर कांकेर, कलेक्टर डॉ. प्रियंका शुक्ला के मार्गदर्शन म कृषि अभियांत्रिकी कांकेर कोति ले विकासखण्ड दुर्गूकोंदल के किसान मन ल धान के बलदा सब्जी अऊ आन व्यावसायिक फसल बर प्रोत्साहित करके उद्यानिकी विभाग (चेम्प्स बीज निगम) अऊ ड्रिप सिंचाई ले लाभान्वित करे जात हे। जिला मुख्यालय कांकेर ले करीबन 70 किलोमीटर दरिहा म स्थित ग्राम सिवनी, आमापारा के किसान महेन्द्र श्रीवास्तव ह पउर साल 2021-22 म कृषि अभियांत्रिकी कांकेर के मार्गदर्शन म ड्रीप सिंचाई के लाभ लेके अपन 22 एकड़ जमीन म ड्रीप सिंचाई के स्थापना करिस अऊ अभी हाल म पूरा 22 एकड़ क्षेत्र म सब्‍जी के खेती करत हे। कीट अऊ रोग नियंत्रण बर रसायनिक दवा मन के संगें-संग जैविक विधि के घलोक उपयोग करके परम्परागत धान के खेती के तुलना म सब्‍जी के व्यवसायिक खेती ले करीबन चार गुना जादा आमदनी प्राप्त करत हे। वो मन 15 ले 20 मनखे मन ल साल भर रोजगार तको देवत हें। किसान महेन्द्र श्रीवास्तव क्षेत्र के आन किसान मन बर प्रेरणा स्रोत बने हें, उंखर अनुसरण करत आन किसान मन घलोक ड्रीप सिंचाई पद्धति ल अपनाके ड्रीप सिंचाई ले खेती करे बर आगू आवत हें। महेन्द्र श्रीवास्तव ह बताइस कि पहिली परंपरागत तरीका ले धान के खेती करत रहिस, जेमां हर साल करीबन ढाई लाख रूपिया के आमदनी होत रहिस। अभी हाल म ड्रिप सिंचाई ले सब्जी के खेती करत हे, जेमां करेला, खीरा, लौकी, मिर्च, टमाटर के फसल होवत हे, जेखर से करीबन 09 लाख 60 हजार रूपिया के शुद्ध लाभ प्राप्त होए हे अऊ सब्जी उत्पादन जारी हे।