धान बेचे के एवज म किसान मन ल 7 हजार 771 करोड़ रूपिया के भुगतान
ए साल 7.5 प्रतिशत जादा किसान अउ 19 प्रतिशत जादा रकबा के पंजीयन
रायपुर, मुख्यमंत्री श्री विष्णु देव साय के अगुवाई म राज्य सरकार ह छत्तीसगढ़ म खरीफ विपणन बछर 2025-26 म केन्द्र सरकार कोति ले घोषित समर्थन मूल्य म राज्य के पंजीयन कर डरे किसान मन ले धान खरीदी के काम सरलग चलत हे। कृषि विभाग के अधिकारी मन बताइन के प्रदेश म 2739 खरीदी केन्द्र के माध्यम ले धान के खरीदी बड़ सुभीता ले होवत हे। धान खरीदी बर 15 नवम्बर 2025 ले 31 जनवरी, 2026 तक के समय तय करे गे हे।
राज्य के किसान मन ले सुभीता से धान बिसाय बर अधिकारी मन ल हुकुम देहे गे हे, उहें अवैध धान परिवहन ऊपर कड़ा निगरानी रखे जात हे।
7.5 प्रतिशत किसान अउ 19 प्रतिशत जादा रकबा के पंजीयन
राज्य म किसान मन ले धान खरीदी बर पूरा बेवस्था करे गए हे। खरीफ विपणन बछर 2025-26 म किसान पंजीयन के काम एकीकृत किसान पोर्टल अउ एग्रीस्टेक पोर्टल के माध्यम ले करे जात हे। अभी धान खरीदी बर 27.40 लाख किसान मन के धान के रकबा 34.39 लाख हेक्टेयर के पंजीयन हो गए हे। जबकि पाछू बछर 25.49 लाख किसान मन ह रकबा 28.76 लाख हेक्टेयर ले समर्थन मूल्य म धान बेचे रिहिन। ए प्रकार पाछू बछर धान बेचइया किसान मन के तुलना म ए साल लगभग 7.5 प्रतिशत किसान अउ 19 प्रतिशत रकबा के पंजीयन जादा होय हे।
एग्रीस्टेक पंजीयन ले छूट
संस्थागत पंजीयन, भूमिहीन किसान (अधिया/रेगहा), डूबान क्षेत्र के किसान, वन अधिकार पट्टाधारी किसान, ग्राम कोटवार (शासकीय पट्टेदार) श्रेणी के किसान मन ल एग्रीस्टेक पंजीयन ले छूट देहे गए हे। किसान पंजीयन के काम अभी घलो चलत हे।
24 घंटा टोकन मिले के सुविधा “टोकन बेवस्था के होइस सरलीकरण”
मुख्यमंत्री श्री साय ह कहिन के किसान मन के हित ल धियान म रखत हमर सरकार ह अब 24 घंटा टोकन मिले के सुविधा “तुंहर टोकन” एप्प म खरीफ विपणन बछर 2025-26 म दे हे। अभी तक 17.24 लाख टोकन ले 87 लाख टन धान खरीदी बर जारी करे जा चुके हे। किसान मन आगू के 20 दिन के टोकन ले सकत हें।
किसान मन मन ल 7 हजार 771 करोड़ रूपिया के तुरते भुगतान
अधिकारी मन बताइन के 11 दिसंबर 2025 के स्थिति म किसान मन ल धान खरीदी के एवज म 7 हजार 771 करोड़ रूपिया के भुगतान समर्थन मूल्य के तहत करे जा चुके हे।
अवैध धान बिक्री/परिवहन ऊपर रोक
जिला मन म विशेष चेकिंग दल के गठन राजस्व, खाद्य, सहकारिता, वन, मंडी आदि विभाग के अधिकारी मन ल मिला के करे गे हे। राज्य स्तर म मार्कफेड अंतर्गत स्टेट इंटीग्रेटेड कमांड एवं कंट्रोल सेंटर (ICCC) के स्थापना करे गे हे। अब तक प्रदेश म अवैध धान परिवहन/भण्डारण के 2000 ले जादा मामला बनाय गे हे, जेमा अब तक 1.93 लाख टन अवैध धान जब्त करे गे हे।