रायपुर, 28 अक्टूबर 2020। प्रदेश सरकार ह धान खरीदी पंजीयन के तारीख ल 10 दिन बर बढ़ा दिस हे। पहली 31 अक्टूबर धान खरीदी पंजीयन के अंतिम तारीख निर्धारित करे गे रिहिस। जोन ल अब 10 नवंबर तक बढ़ा दे गे हे।
विधानसभा के विशेष सत्र म कृषि मंत्री रविंद्र चौबे ह सदन म तारीख बढ़ाए जाए के घोषणा करिन। बता देथन कि मंगलवार के सदन म धान खरीदी ल लेके विपक्ष ह जोरदार हंगामा करिन। उहें राज्य के नवा कृषि विधयेक ल लेके आपत्ति जताइस। भारी हंगामा के बीच विधानसभा म मंगलवार के नवा कृषि विधेयक ल पारित करे गिस। एखर संग विधानसभा के सत्र अनिश्चितकाल बर स्थगित होगे।
