राज्य के सबो जिला मन म समर्थन मूल्य म धान खरीदी के सिलसिला जारी

रायपुर, राज्य के सबो जिला मन म किसान मन ले समर्थन मूल्य म धान खरीदी के सिलसिला बिना कोनो व्यवधान के सरलग चलत हे। धान खरीदी शुरू होए अभी चारेच दिन होए हे, एखर बाद घलोक राज्य के उपार्जन केंद्र मन म धान के आवक तेजी ले होए लगे हे। राज्य म औसतन रोजेच दू ले ढाई लाख कुंटल धान के उपार्जन समर्थन मूल्य म होए लगे हे। सहकारी समिति के कर्मचारी मन के हड़ताल के बाद घलोक पूरा राज्य म धान खरीदी अप्रभावित हे। सबो समिति मन अऊ उपार्जन केंद्र मन म धान लेके अवइया किसान मन ले बिना कोनो रूकावट के धान खरीदी करे जात हे। 17 नवंबर के राज्य म किसान मन ले 2,43,831 कुंटल धान के खरीदी समर्थन मूल्य म करे गीस, जेमां 1,05,342 कुंटल मोटा, 71,603 कुंटल पतला अऊ 66,886 कुंटल सरना धान सामिल हे।
मुख्यमंत्री श्री विष्णु देव साय के मंशा के मुताबिक राज्य के सबो 2739 धान उपार्जन केन्द्र मन म किसान मन के सुविधा बर पारदर्शी टोकन प्रणाली, इलेक्ट्रॉनिक तौल मशीन, नमी मापक यंत्र, बारदाना अऊ आन सुविधा ठउका करे गए हे, ताकि किसान मन ल कोनो प्रकार के दिक्कत झन होवय। धान उपार्जन के समानांतर किसान मन ल भुगतान के व्यवस्था घलोक छत्तीसगढ़ सरकार ह ठउका करे हे। ए साल धान खरीदी खातिर छत्तीसगढ़ सरकार ह छत्तीसगढ़ राज्य विपणन संघ ल 26,200 करोड़ रूपिया के बैंक गांरटी देहे हे, ताकि किसान मन ल समर्थन मूल्य के भुगतान म कोनो प्रकार के दिक्कत झन होवय।
खाद्य विभाग ले मिले जानकारी के मुताबिक राज्य के सबो 33 जिला मन म धान खरीदी के शुरूआत हो गे हे। रिपोट के आधार म 17 नवंबर ल 725 उपार्जन केन्द्र मन म किसान मन ह अपन धान बेचे हें। बेमेतरा जिला म सबले जादा 39,015 कुंटल धान के उपार्जन करे गीस, जबकि राजनांदगांव जिला ह 35,162 कुंटल अऊ रायपुर जिला ह 28,272 कुंटल धान के उपार्जन करके क्रमशः दूसर अऊ तीसर जगा म हे। खाद्य विभाग ले मिले रिपोट के मुताबिक 17 नवंबर ल बस्तर जिला म 95.2 कुंटल बीजापुर म 137.2 कुंटल, दंतेवाड़ा म 1.6 कुंटल, कांकेर म 80, कोण्डागांव म 1147.6, नारायणपुर म 7.2, सुकमा म 24.4, बिलासपुर म 1573.6, गौरेला-पेड्रा-मरवाही म 2550, जांजगीर चांपा म 67.6, कोरबा म 97.2, मुंगेली म 2224, रायगढ़ म 1413.2, सक्ती म 48, सारंगढ़-बिलाईगढ़ म 917.6, बालोद म 19656, बेमेतरा म 39015.2, दुर्ग म 27699.2, कवर्धा म 3682.4, राजनांदगांव म 35162.4, खैरागढ़-छूईखदान-गंडई म 14322.8, मोहला-मानपुर-अंबागढ़-चौकी म 834.8, बलौदाबाजार म 19419.6, धमतरी म 25227.2,गरियाबंद म 9106.4, महासमुंद म 1073.6, रायपुर म 28272.4, बलरामपुर म 612.4, जशपुर म 224, कोरिया म 1193.6, सरगुजा म 276.8, सूजरपुर म 1456.4, मनेंद्रगढ़-चिरमिरी-भरतपुर म 212 कुंटल धान के उपार्जन समर्थन मूल्य म करे गीस। जिला मन ले मिलत सूचना के मुताबिक उपार्जन केन्द्र मन म धान खरीदी के चॉक-चौबंद व्यवस्था ल लेके किसान प्रसन्न हे। ओ मन ल उपार्जन केन्द्र म धान बेचे खातिर न तो अगोरा करना परत हे, न ही धान तौलाई म कोनो प्रकार के दिक्कत होवत हे।