समर्थन मूल्य म धान खरीदी बर सबो तैयारी लउहे पूरा करव: मुख्य सचिव

रायपुर, मुख्य सचिव श्री अमिताभ जैन ह काली मंत्रालय महानदी भवन ले वीडियो कॉन्फ्रेंसिंग के संग समर्थन मूल्य म धान खरीदी अऊ राज्य शासन के महत्वपूर्ण योजना मन के क्रियान्वयन के समीक्षा करिन। वीडियो कॉन्फ्रेंसिंग म संभागायुक्त, कलेक्टर अऊ कई विभाग के अधिकारी मन सामिल होइन। मुख्य सचिव ह धान खरीदी अऊ कस्टम मिलिंग, समिति मन ले धान परिवहन के व्यवस्था के संग ये खरीफ सीजन म धान खरीदी के संबंध म अवइया शिकायत मन के निराकरण के संबंध म विस्तार ले समीक्षा करिन। मुख्य सचिव ह अधिकारी मन ल धान खरीदी केन्द्र मन म किसान मन के सुविधा बर सबो जरूरी व्यवस्था मुहैया कराए के निर्देश दीन।
बैठक म मुख्य सचिव ह नगरीय निकाय मन म लीगेसी वेस्ट के निराकरण के कार्ययोजना के प्रगति के विस्तार ले समीक्षा करिन। उमन नगर निगम, रायपुर, कोरबा, दुर्ग, रायगढ़, जगदलपुर, धमतरी अऊ राजनांदगांव म लीगेसी वेस्ट के निराकरण के कार्ययोजना के क्रियान्वयन के जानकारी जिला के कलेक्टर मन ले लीन। राज्य म संचालित दूषित जल उपचार संयंत्र मन के संचालन के स्थिति के जानकारी घलोक कलेक्टर मन ले लेहे गीस। मुख्य सचिव ह अधिकारी मन ले ग्राम पंचायत मन म सालिड वेस्ट मैनेजमेंट के कार्ययोजना अऊ ओखर प्रगति के विस्तार ले जानकारी लीन।
मुख्य सचिव ह ऑनलाइन नामांतरण योजना के क्रियान्वयन के समीक्षा करत राजस्व विभाग के अधिकारी मन ल कहिन कि जमीन के रजिस्ट्री होतेच नामांतरण के ऑनलाइन व्यवस्था चालू करे जाए। उमन ये संबंध म अधिकारी-कर्मचारी मन ल जरूरी प्रशिक्षण प्रदान करे के निर्देश विभागीय अधिकारी मन ल दीन। श्री जैन ह कहिन कि राजस्व अऊ कृषि विभाग के अधिकारी मन ल फसल कटाई परयोग के संबंध म निर्देश दीन के गिरदावरी के समय अधिकारी मन घलोक किसान मन के संग खेत मन म मौजूद रहव।
बैठक म राज्य योजना आयोग के अंतर्गत राज्य म सतत् विकास लक्ष्य के स्थानीयकरण (एसडीजी) के जिला स्तर म लक्ष्य के मूल्यांकन म सुविधा बर डिस्ट्रिीक्ट फ्रेम वर्क के संबंध म योजना आयोग के अधिकारी मन ह प्रेजेंटेशन के जरिये विस्तृत जानकारी दीन। मुख्य सचिव ह सतत् विकास लक्ष्य के स्थानीयकरण के तहत सबो विभाग मन के भारसाधक सचिव, विभागाध्यक्ष, जिला कलेक्टर अऊ जिला पंचायत के मुख्य कार्यपालन अधिकारी मन ल निर्देशानुसार कार्यवाही सुनिश्चित करे के निर्देश दीन। बैठक म कृषि विभाग के सचिव डॉ. कमलप्रीत सिंह, खाद्य विभाग के सचिव श्री टोपेश्वर वर्मा, राजस्व विभाग के सचिव श्री एन.एन.एक्का, मार्कफेड के प्रबंध संचालक श्री मनोज सोनी, नान के प्रबंध संचालक श्री निरंजन दास संग पंचायत ग्रामीण, कृषि अऊ आर्थिक सांख्यिकी अऊ योजना विभाग के अधिकारी सामिल होइन।