समर्थन मूल्य म धान खरीदी: मेहनत के वाजिब दाम मिले ले खुश हे किसान

बिलासपुर, छत्तीसगढ़ म मुख्यमंत्री श्री भूपेश बघेल के घोषणा के मुताबिक प्रदेश के किसान मन ले समर्थन मूल्य म धान खरीदी के काम एक दिसम्बर ले शुरू हो गए हे। राज्य के कई ठन जिला मन के सहकारी समिति मन म बनाये गए खरीदी अऊ उपार्जन केन्द्र मन म किसान मन ल कोनो प्रकार के परेशानी झन होवय एखर बर व्यापक प्रबंध करे गए हे। किसान अपन बारदाना म सहकारी समिति मन म धान बेच सकत हें। बारदाना के कीमत किसान मन ल देहे जाही। ये खरीफ विपणन साल म छत्तीसगढ़ म करीब 105 लाख मीट्रिक धान के खरीदी के अनुमान हे। धान खरीदी पंजीकृत किसान मन ले करे जात हे। धान के आन राज्य मन ले अवैध परिवहन झन होवय एखर बर छत्तीसगढ़ के सीमा मन म चेक पोस्ट बनाके कड़ी निगरानी करे जात हे। एखर बर पुलिस, राजस्व अउ खाद्य विभाग के अधिकारी मन के टीम बनाए गए हे। खरीदी केन्द्र मन म अवइया किसान मन म खुशी अउ उत्साह देखे जात हे। मेहनत के वाजिब दाम मिले ले किसान खुश हे।
बिलासपुर जिला के कोटा विकासखंड के पिपरतराई धान खरीदी केन्द्र म समर्थन मूल्य म धान बेचे आए किसान समिति म धान खरीदी बर करे गए व्यवस्था मन ले संतुष्ट नजर आइन।
पिपरतराई धान खरीदी केन्द्र म धान बेचे आए किसान श्री रामनाथ साहू ह बताइस कि उमन 60 क्विंटल धान बर टोकन कटाए हें। ऊंखर पास 12 एकड़ कृषि जमीन हे। उमन कहिन कि इहां जम्‍मो व्यवस्था बहुत अच्छा हे। ओ मन ल धान बेचे म कोनो प्रकार के कोनो परेशानी नइ आईस। श्री प्रदीप कुमार साहू ह 100 क्विंटल धान ये केंद्र म समर्थन मूल्य म बेचे हे। उमन बताइन कि धान खरीदी केंद्र म टोकन व्यवस्था शानदार हे। धान बेचे म कोनो दिक्कत नइ होवत हे। राजीव गांधी किसान योजना बर उमन मुख्यमंत्री के आभार जताइन।
श्री शेष नारायण ह 13 क्विंटल धान बर टोकन कटाए हे। उमन जुन्ना बारदाना के मूल्य 18 रूपिया ले बढ़ाके 25 रूपिया करे म मुख्यमंत्री के आभार जताइन। ओ कहिस कि राज्य सरकार ह किसान मन के हित म बड़का फैसला लेहे हे, एखर से किसान मन ल फायदा होही। श्री प्रेमलाल साहू ह 52 क्विंटल धान के बिक्री करे हे। उमन कहिन कि धान खरीदी केंद्र म किसान मन के सहूलियत के पूरा ध्यान रखे जात हे। ओ मन धान बिक्री के व्यवस्था ले बहुत प्रसन्न हे। टोकन मिले के दूसरेच दिन धान के तौलाई होवत हे। ओ मन कहिन कि किसान मन ल अइसन सुविधा मिले ले खेती किसानी करे म उत्साह आथे। पिपरतराई धान केंद्र म 1 हजार 67 पंजीकृत किसान हे। इहां पिपरतराई, खरगहनी, कलारतराई, रानी सागर, छेरकाबांधा अउर बांकीघाट गांव के किसान अपन धान बेचे आथे।