रक्षाबंधन बर बनावत हे राखी, मिलत हे घर म ही रोजगार
जांजगीर, 13 जुलाई 2020। भाई-बहिनी के रिश्ता ले जुड़े पवित्र तिहार रक्षाबंधन म ये पइत भाई मन के कलाई मन म धान, चावल, रूद्राक्ष, रंगीन मोती, स्टोन अऊ ऊन ले बने राखी सजही। जांजगीर जिला के राष्ट्रीय ग्रामीण आजीविका मिशन बिहान ले जुड़े स्व सहायता समूह के महिला मन एखर तैयारी शुरू कर देहे हें। स्व-सहायता समूह कोति ले बने राखी आसपास के दुकान मन म मिलना शुरू हो गए हे। एखर से ए महिला समूह मन के बनेच आमदनी होवत हे। संगेच लोगन ल सस्ता दाम म सुग्घर राखी मिलत हे।
जांजगीर जिला के जनपद पंचायत बम्हनीडीह के ग्राम पंचायत परसापाली, पोडीशंकर के महिला स्व सहायता समूह मन के सदस्य मन के कहना हे के छत्तीसगढ़ी देशी राखी के निर्माण म धान, चावल अउ आन अनाज के उपयोग करे जात हे। पाछू एक हफ्ता ले राखी बनाके ओ मन ल आसपास के मार्केट म बेचे जात हे, एकर से समूह ल बनेच आमदनी होवत हे। रक्षाबंधन तिहार के पहिली समूह के महिला मन घर म कोरोना वायरस ल ध्यान म रखत रेशम के धागा, छोटे-बड़े मोती, चावल के दाना, अलग-अलग रंगीन कपड़ा, छोटे-छोटे रूद्राक्ष, रंगीन पत्थर आदि मार्केट ले खरीदके वोखर से राखी बनावत हें।
