25 एकड़ म धान के खेती, प्रति एकड़ लगभग 7 हजार रुपिया के बचत के संग समय अऊ श्रम के होइस बचत
आधुनिक कृषि तकनीक ले बदलिस खेती के तस्वीर
बालोद, छत्तीसगढ़ म किसान आधुनिक कृषि तकनीक मन ल अपनाके खेती ल जादा लाभकारी अऊ किफायती बनावत हें। कृषि विभाग के मार्गदर्शन अऊ उन्नत कृषि यंत्र मन के उपयोग ले खेती म लागत कम होए के संग उत्पादकता घलोक बाढ़त हे। इही दिशा म बालोद जिला के गुण्डरदेही विकासखंड के ग्राम खल्लारी के रहवइया प्रगतिशील किसान श्री डिकेश्वर कुमार साहू ह पैडी ट्रांसप्लांटर (धान रोपाई मशीन) के उपयोग ले खेती म उल्लेखनीय सफलता हासिल करके क्षेत्र के किसान मन बर प्रेरणादायी उदाहरण प्रस्तुत करे हे।
25 एकड़ म आधुनिक तकनीक ले धान के रोपाई
किसान डिकेश्वर साहू लगभग 25 एकड़ जमीन म धान के खेती करथे। पहिली धान रोपाई के समय ओ ल मजदूर मन के कमी अऊ बाढ़त मजदूरी के सेती काफी कठिनाई के सामना करना परत रहिस। पारंपरिक तरीका ले धान के रोपाई कराए म प्रति एकड़ लगभग 8 हजार रुपिया के खरचा आवत रहिस। कृषि विभाग के ग्रामीण कृषि विस्तार अधिकारी के मार्गदर्शन म वो ह पहिली हाथ ले चलइया पैडी ट्रांसप्लांटर अपनाइस। एखर से मिले बढ़िया परिणाम के बाद वो ह ए बछर छै लाइन वाला आधुनिक पैडी ट्रांसप्लांटर बिसाइस, जेखर से खेती अऊ जादा आसान अऊ लाभकारी हो गे।
प्रति एकड़ लगभग 7 हजार रुपिया के बचत
डिकेश्वर साहू ह बताइस के आधुनिक मशीन के उपयोग ले धान रोपाई के लागत म उल्लेखनीय कमी आए हे। पहिली जिहां प्रति एकड़ लगभग 8 हजार रुपिया खरच होत रहिस, उहें अब मशीन के माध्यम ले ए खर्च घटके लगभग 1 हजार रुपिया प्रति एकड़ रहि गे हे। ए प्रकार ओ ल प्रति एकड़ लगभग 7 हजार रुपिया के बचत होवत हे। संगेच 25 एकड़ म रोपाई के काम कम समय म पूरा हो जाय ले मिहनत अऊ समय दुनों के बचत होवत हे।
बेहतर रोपाई ले बाढि़स फसल के गुणवत्ता
पैडी ट्रांसप्लांटर ले रोपाई करे म पौधा मन के बीच समान दूरी बने रहिथे, जेखर से हर एक पौधा ल भरपूर हवा, पानी अऊ पोषक तत्व मिलथे। एखर परिणामस्वरूप फसल के बेहतर विकास होथे अऊ उत्पादन बढ़े के संभावना घलोक जादा रहिथे। आधुनिक तकनीक के उपयोग ले खेती वैज्ञानिक अऊ जादा लाभकारी बनत हे।
आन किसान मन ले आधुनिक तकनीक अपनाए के अपील
किसान डिकेश्वर साहू ह जिला के आन किसान मन ले घलोक आधुनिक कृषि यंत्र मन के जादा ले जादा उपयोग करे के अपील करे हे। ओ ह कहिस के छत्तीसगढ़ सरकार के किसान हितैषी योजना मन ले किसान मन ल धान के बेहतर मूल्य मिलत हे। अइसन म किसान मन ल आधुनिक कृषि तकनीक अऊ यंत्रीकरण ल अपनाके कम लागत, कम समय अऊ जादा उत्पादन के लक्ष्य कोति आगू बढ़ना चाही। ओखर मानना हे के आधुनिक खेती ही भविष्य के समृद्ध खेती हे अऊ इही किसान मन के आय बढ़ाय के प्रभावी माध्यम घलोक हे।
