रायपुर, 17 अगस्त 2020। कोरोना काल म आनलाइन शिक्षा ल आसान बनाय बर पढ़ई तुंहर दुआर एन्ड्राएड एप ल तैयार करे गे हे। ये एप ल छत्तीसगढ़ सरकार के स्कूल शिक्षा विभाग अउ एनआईसी ह मिल के तैयार करे हे। ये एप ले विद्यार्थी मन ह इंटरनेट उपलब्ध होय म अपन पाठ्यक्रम ले संबंधित कन्टेंट ल डाउनलोड कर सकही। डाउनलोड करे गे वीडियो अउ आने कन्टेंट जब इंटरनेट ह उपलब्ध नई हो, तब घलो आफलाइन देखे जा सकही। ये एप दूरस्थ अंचल के विद्यार्थी मन बर काफी उपयोगी हे। ये एप ल गूगल प्ले स्टोर ले डाउनलोड करे जा सकत हे।
बता देथन कि सीएम भूपेश बघेल ह स्कूल के विद्यार्थी मन बर घर बइठे पढ़ई बर आनलाइन सुविधा उपलब्ध कराये ल लाकडाउन के दौरान अप्रैल म पढ़ई तुंहर दुआर के वेबसाइट लांच करे रिहिस। आनलाइन शिक्षा के योजना के लाभ लगभग 22 लाख लईका मन ल मिलत हे अउ 2 लाख शिक्षक-शिक्षिका मन ह ये व्यवस्था ले जुड़े हे।
