नारायणपुर जिला म पढ़ई तुंहर दुआर: घर-घर लइका पढ़त हें कहूं चटई म त कोनो खटई म त कहूं कुर्सी म

नारायणपुर, 27 अप्रैल 2020। देश म लॉकडाउन के सेती आन प्रदेश के संगेच छत्तीसगढ़ के हर जिला के स्कूल बंद हे। आज के नवा जमाना म जब संचार माध्यम के साधन बाढ़ गे हे। मुख्यमंत्री श्री भूपेश बघेल के मंशा के मुताबिक लइका मन के पढ़ई प्रभावित झन होवय, एखर बर राज्य शासन के स्कूल शिक्षा विभाग ह ‘‘पढ़ई तुंहर दुआर‘‘ नाम ले ऑनलाईन पोर्टल तियार करे हे। अब नारायणपुर जिला के हर घर म रहिके लइका मोबाईल के संग कोनो चटाई म त कोनो कुसी म, त कोनो खटिया म बइठके पढ़ई करत हें।

जिला मुख्यालय ले सटे गांव के लइका मन म ऑनलाईन पढ़ाई ल लेके बिकट उत्सुकता देखे ल मिलत हे। ऑनलाईन पोर्टल ले 1350 शिक्षक अऊ 4500 स्कूली विद्यार्थी मन घलोक जुड़ गये हें। जिला म 24 अप्रेल ले लइका मन के ऑनलाईन पढ़ाई शुरू हो गए हे। स्कूल शिक्षा विभाग के अधिकारी मन के बताती स्कूल के प्रधान पाठक, प्राचार्य अऊ संकुल समन्वयक मन ल नोडल अधिकारी बनाए गए हे। लइका मन ल मोबाईल के जरिये पढ़ाए बर कक्षा पहली ले दसवीं तक के लइका मन ल पढ़ाए बर कई विषय के कक्षावार साप्ताहिक समय-सारिणी घलोक तियार के गए हे। पढ़ईया लईका मन ल समय-सारिणी के जानकारी नगरीय अउ ग्रामीण क्षेत्र मन म घर-घर जाके घलोक देहे गए हे।

जिला के जऊन ग्रामीण क्षेत्र मन म नेट के समस्या हे, अइसे क्षेत्र मन म लगनशील शिक्षक लइका मन ल कई ठन आनतरीका के जरिये शिक्षा देवत हें। उहें एक कोडोली स्कूल के शिक्षक श्री देवेंद्र देवांगन ह हफ्ता म ग्रामीण क्षेत्र मन म जाके वीडियो ल लइका मन के अविभावक या बड़े भाई-बहिनी के मोबाइल म पढ़ाई संबंधी विडियो/ऑडियो ल अपलोड करे के काम करत हे। नक्सल हिंसा पीड़ित गांव कोडोली नेटवर्क पहुंच ले बहुत दूर हे। नेटवर्क के समस्या ल देखत शिक्षक ह ये एक नवा तरीका अपनाए हे। श्री देवांगन के काम ल लइका मन के अविभावक मन सहरावत हें। मोबाइल म अपलोड करे गए विडियो ले अभिभावक अपन लइका मन ल पढ़ावत हें।