मुख्यमंत्री श्री भूपेश बघेल ह संगीतज्ञ श्री मदन सिंह चौहान अउ सुनील तिवारी के करिन सम्मान

रायपुर, 27 जनवरी 2020/ मुख्यमंत्री श्री भूपेश बघेल काली गणतंत्र दिवस के अवसर म महंत घासीदास संग्रहालय के मुक्ता काशी मंच म आयोजित सांस्कृतिक संध्या म सामिल होइन। मुख्यमंत्री ह ए मौका म छत्तीसगढ़ के संगीतज्ञ श्री मदन सिंह चौहान गुरूजी ल कला के क्षेत्र म पद्मश्री सम्मान के घोषणा होए म सम्मानित करिन अऊ ओ मन ल बधाई अऊ शुभकामना दीन। मुख्यमंत्री ह लोक गायक श्री सुनील तिवारी के घलोक सम्मान करिन।
ये बेरा म मुख्यमंत्री ह रायपुर के पुलिस परेड मैदान म निकाले गए झांकी मन म पहिली, दूसर अऊ तीसर नंबर पवैया झांकी ल पुरस्कार प्रदान करिस। पहिली पुरस्कार ग्रामोद्योग विभाग के झांकी ल दे गीस। मुख्यमंत्री के हाथ पुरस्कार ग्रहण ग्रामोद्योग विभाग के सचिव श्री हेमंत पहारे ह करिस। दूसर पुरस्कार जेल विभाग के झांकी ल मिलीस। पुरस्कार ग्रहण जेल विभाग के श्री संजय पिल्ले अऊ वन विभाग के झांकी ल तीसर पुरस्कार बर प्रधान मुख्य वन संरक्षक श्री राकेश चतुर्वेदी ह ग्रहण करिन।
संस्कृति विभाग कोति ले आयोजित सांस्कृतिक संध्या म देश भक्ति अऊ छत्तीसगढ़ संस्कृति के जम्मो तीज त्यौहार ऊपर आधारित रंगारंग कार्यक्रम प्रस्तुत करे गीस। सुश्री बॉबी मंडल ह देश भक्ति गीत वन्दे मातरम अऊ नवनीत तिवारी ह जहां डाल डाल म सोने के चिड़ियां करती हे बसेरा गीत प्रस्तुत करिस। गीत के संग कलाकार मन ह आकर्षक नृत्य घलोक प्रस्तुत करिन। छत्तीसगढ़ी गायक श्री सुनील तिवारी अऊ सहयोगी कलाकार मन ह छत्तीसगढ़ के संस्कृति अऊ तीज तिहार ऊपर आधारित गीत प्रस्तुत करिस। गायक श्री तिवारी अऊ सहयोगी कलाकार ह छत्तीसगढ़ के राज्य गीत अरपा पैरी के धार, गौरा-गौरी, सुआ गीत, बिहाव गीत, पंथी, होली गीत, मोर संग चलव रे मोर संग चलव गा, भरथरी आदि गीत के प्रस्तुति दीन। गीत के संग कलाकार मन ह आकर्षक नृत्य घलोक प्रस्तुत करिन।
कार्यक्रम म सांसद श्री सुनील सोनी, विधायक श्री बृजमोहन अग्रवाल, श्री धरमलाल कौशिक, रायपुर नगर निगम के महापैार श्री एजाज ढेबर, संस्कृति विभाग के सचिव श्री अन्बलगन पी., संचालक श्री अनिल कुमार साहू संग बड़ संख्या म दर्शक मौजूद रहिन।