अम्बिकापुर 8 जुलाई 2021। कलेक्टर श्री संजीव कुमार झा के हुकुम पा के जिला के दुर्गम गांव अउ बसाहट मन म स्वास्थ्य विभाग के टीम ह स्वास्थ्य जांच अउ जन जागरूकता शिविर के आयोजन करत हे। इही कड़ी म सामुदायिक स्वास्थ्य केंद्र बतोली के टीम ह 4 किलोमीटर पहाड़ी चढ़के ग्राम पंचायत नकना के पहाड़पारा म स्वास्थ्य जांच अउ जागरूकता शिविर लगाइस। शिविर म विशेष पिछड़ी जनजाति पहाड़ी कोरवा समुदाय के करीब 100 मनखे मन के निःशुल्क स्वास्थ्य परीक्षण करे गीस जेमां मलेरिया जांच, हिमोग्लोबिन जांच, कोरोना जांच सामिल हे। मनखे मन ल स्वास्थ्य के प्रति जागरूक रहे बर चिकित्सा परामर्श प्रदान करे गीस। मनखे मन ल मलेरिया ले सुरक्षित रखे बर निःशुल्क मच्छरदानी के वितरण घलोक करे गीस।
बतौली बीएमओ डॉ संतोष सिंह ह बताइस कि जनपद मुख्यालय बतौली ले करीबन 25 किलोमीटर दूर स्थित ग्राम पंचायत नकना के दुर्गम बसाहट पहाड़पारा म बुधवार के स्वास्थ्य विभाग कोति ले शिविर लगाए गीस। कर्मचारी मन ह ग्राम पंचायत नकना तक 21 किलोमीटर वाहन ले 4 किलोमीटर पैदल पहाड़ी म चढ़के आदिवासी बाहुल्य पहाड़पारा तक पहुंचिन। शिविर म गांव वाले मन ल वैक्सीन लगवाए बर प्रेरित करे गीस। कोविड ले बचाव बर मास्क लगाय अऊ सोशल डिस्टेंस के पालन करे बर समझाईश देहे गीस। सामुदायिक स्वास्थ्य केंद्र बतौली के विशेष टीम गठित करे गए हे जेन रोजेच दूरस्थ अंचल के दौरा करके मनखे मन ल निःशुल्क स्वास्थ्य सुविधा देहे के संग परामर्श प्रदान करत हे।
स्वास्थ्य परीक्षण के बेरा म आरएमए डॉ रितेश पटेल, बीपीएम अमित एक्का अऊ स्वास्थ्य विभाग के आन कर्मचारी श्रद्धा कर, रामकृपाल कुशवाहा, दिलीप एक्का, विपिन कुमार, अऊ सुराजी किंडो उपस्थित रहिन।
4 किलोमीटर पहाड़ी चढ़के स्वास्थ्य टीम ह लगाइस पहाड़पारा म शिविर
