जशपुर जिला के मनोरा विकासखण्ड अंतर्गत ग्राम हर्रापाठ
जशपुरनगर, 21 दिसंबर 2023। कुछ साल पहिली पहाड़ी कोरवा पुनियारी बाई तीर न कोनो घर रहिस अऊ न ही कोनो नियमित ठिकाना। जइसे-तइसे झिपरा के मकान बनाके वो ह रहत रहिस। पुनियारी बाई ह कभू सोचे नइ रहिस कि एक दिन ओखर घर घलोक पक्का बन पाही। पाठ इलाका म रहइया पुनियारी बाई प्रधानमंत्री आवास मिले ले खुश हे, पहिली बरसात के दिन म वोकर झोपड़ी के छत ले पानी टपके ले वोला बिकट परेशानी के सामना करना परत रहिस। अब पक्का मकान म रहे ले वोखर कई समस्या दूर हो गे।
जशपुर जिला के मनोरा विकासखण्ड अंतर्गत ग्राम हर्रापाठ म रहइया पहाड़ी कोरवा श्रीमती पुनियारी बाई ह बताइस कि ओ ह पहिली टूटे-फूटे झोपडी म रहत रहिस। पति के जीयत रहे म तको उंकर पक्का मकान बर एक सपना रहिस। कोनो अइसे आमदनी नइ रहिस कि ओ मन अपन झोपड़ी ल पक्का बना सकयं। वो ह बताइस कि पति के मौत के बाद जीवनयापन बहुत कठिन हो गे। वोखर पांच लइका हे, अइसन म प्रधानमंत्री आवास स्वीकृत होए के बाद पक्का मकान बने ले वोखर घर के समस्या काफी हद तक दूर हो गे। पहाड़ी कोरवा पुनियारी बाई के कहना हे कि पक्का मकान के बार-बार मरम्मत के नौबत नइ आवय, बारिश के दिन म घलोक छत ले पानी गिरेके समस्या दूर हो गे हे। बेवा पुनियारी बाई ह प्रधानमंत्री घर योजना के सराहना करत कहिस कि ये मकान गरीब मन बर सिरिफ एक छतेच नइ हे, भलुक अवइया बेरा के बेहतर भविष्य घलोक ये। वो ह छत्तीसगढ़ म 18 लाख पीएम आवास के स्वीकृति अ निर्माण ल गति देहे म प्रधानमंत्री श्री नरेन्द्र मोदी अऊ मुख्यमंत्री श्री विष्णुदेव साय ल धन्यवाद घलोक दीस।
