- अवइया पंद्रह दिन गौठान मन बर पैरादान बर चलाए जाही व्यापक मुहिम
- कलेक्टर ह बैठक लेके अधिकारी मन ल दीन निर्देश
- धान खरीदी केंद्र मन म लाउडस्पीकर ले होही अपील
- गौठान ल बढ़ाए अच्छा काम करइया ह गणतंत्र दिवस के अवसर म होही सम्मानित
दुर्ग, पैरादान महादान ये नारा के संग गांव वाले मन ले पैरादान बर स्थानीय स्तर म आग्रह करे जाही। दिन म एखर बर रथ चलाए जाही जेमां पैरादान के अपील करे जाही। गौठान ले होवइया लाभ मन के संबंध म अवगत कराए जाही अऊ पैरादान करके गोवंश संवर्धन अऊ एखर माध्यम ले गौठान मन के विकास करके गांव ल आर्थिक विकास के रद्दा म आगू लाय के आग्रह करे जाही।
नरवा-गरवा-घुरूवा-बाड़ी योजना के संबंध म ये समीक्षा बैठक कलेक्टर श्री अंकित आनंद ह जिला पंचायत स्थित सभाकक्ष म लीन। कलेक्टर ह कहिन कि गौठान मन के बेहतर संचालन बर बहुत मात्रा म चारा संग्रहित करव। एखर बर गांव वाले मन ले अपील करे जाय। मंझनिया के रथ के माध्यम ले पैरादान के व्यापक प्रचार करे जाए। पहट के बेरा रतिहा चौपाल लगाए जाय, रतिहा चौपाल म गांव के किसान मन ले पैरादान बर आग्रह करे जाए। इहां गौठान मन ले होवइया लाभ मन के संबंध म घलोक विस्तार ले जानकारी दिए जाय, संगेच ये मा व्यापक जनभागीदारी के आह्वान घलोक करव। कलेक्टर ह कहिन कि धान खरीदी केंद्र मन म घलोक लाउडस्पीकर लगाके किसान मन ल पैरादान बर प्रेरित करव। कलेक्टर ह कहिन कि गौठान ग्रामीण अर्थव्यवस्था के धुरी हो सकत हे। इंकर महत्व के बारे म रतिहा चौपाल म बातचीत करे जाय।
कंपोस्ट खाद के बाजार घलोक चिन्हांकित करव– बैठक म जिला पंचायत सीईओ श्री कुंदन कुमार ह कहिन कि गौठान मन म गोबर के संग्रहण करके कंपोस्ट खाद तियार करवाव। कंपोस्ट खाद के बाजार म बड़ माँग हे अऊ मनखे मन ल जैविक खेती कोति प्रेरित होवत हें। गौठान मन म बनइया कंपोस्ट खाद बर बाजार चिन्हांकित करव। कंपोस्ट खाद के विक्रय अऊ अच्छा दाम मिले ले गौठान मन के उपयोग के संबंध म ग्रामीण अऊ सजग होहीं। उमन गौठान मन ले लगे बाड़ी मन म सब्जी के उत्पादन के घलोक समीक्षा करिन। सीईओ ह कहिन कि पशुधन विकास विभाग के माध्यम ले नस्ल संवर्धन बर काम करे जात हे अऊ पशु चिकित्सक सरलग गौठान मन म जाके पशु मन के स्वास्थ्य के मानिटरिंग करत हें। पशुधन के संगेच आय के अलावा बाड़ी के माध्यम ले घलोक आय बढ़ाना हे।
गणतंत्र दिवस के दिन गौठान बर अच्छा काम करइया होही सम्मानित– कलेक्टर श्री अंकित आनंद ह कहिन कि गणतंत्र दिवस के दिन गौठान मन के विकास बर सुग्घर काम करइया मनखे के चिन्हारी करके सम्मान करे जाही। उमन अधिकारी मन ले कहिन कि बहुत अकन मनखे गौठान के विकास बर बहुत अच्छा काम करत हें। ओ मन ल प्रोत्साहित करव अऊ चिन्हांकित करव ताकि ओ मन ल गणतंत्र दिवस के अवसर म पुरस्कृत करे जा सकय।
मुख्यमंत्री ह घलोक जामगांव एम म गांव वाले मन ले कहे रहिन बात– इतवार के धान खरीदी केंद्र जामगांव एम अऊ आन धान खरीदी केंद्र मन म पहुंचे मुख्यमंत्री श्री भूपेश बघेल ह गांव वाले मन ले पैरादान के बात कहे रहिन। उमन कहे रहिन कि गौठान आप मन के हे। पशुधन आप मन के हे। आप मन इंकर बर पैरादान करहू त आप मन के खड़े फसल के रक्षा होही। गौठान म जतका पशु आहीं, ओतकेच वर्मी कंपोस्ट बना पाहू अऊ गौठान उपयोगी आर्थिक ईकाई के रूप म घलोक तियार होही। मुख्यमंत्री ह कहिन कि जिहां तक संभव हे उहां तक पैरा दान करके गौठान म पहुंचावव, काबर के दान के संपूर्ण माहातम्य तब होथे जब जरूरतमंद ल स्थल म पहुंचाके ओला जरूरी संसाधन उपलब्ध कराए जाए।