स्वच्छता अऊ सुरक्षा के प्रति जागरूकता के मिसाल

गोबर बेंच के दिलमत बाई कमाइस पइसा अऊ बनवाइस पक्का शौचालय

कोरिया, छतीसगढ़ शासन के महत्वाकांक्षी योजना गोधन न्याय योजना पूरा प्रदेश म नवा आयाम गढ़त हे। ये ह ग्रामीण अर्थव्यवस्था ल सुदृढ़ बनाए म महती भूमिका निभावत हे। गोबर बेचके अकतहा आमदनी ले किसान अऊ पशुपालक मन अपन सपना साकार करत हें।
अभी तक हमन सुने रहेन के मनखे मन ह गोबर बेचे ले मिले पईसा के उपयोग खेती-किसानी, गाय-बछरू बिसाए ले लेके लइका मन के पढ़ई-लिखाई, घर बई, अऊ फटफटी बिसाए जइसे काम करत हें। फेर दिलमत बाई ह ए सबले हटके काम करिस, वो ह स्वच्छता अऊ सुरक्षा के मिसाल कायम करिस ये मां वोखर मदद करिस शासन के गोधन न्याय योजना ह।
विकासखण्ड खड़गवां के ग्राम पंचायत खंधौरा के दिलमत बाई साहू ह ग्राम गौठान म गोबर बेचके व्यक्तिगत शौचालय बनवाके स्वच्छता अऊ सुरक्षा के मिसाल पेश करे हे। ओकर बताती वोकर परिवार म बहु-बेटि मन संग 11 मनखे हें। वोकर घर के शौचालय के स्थिति खराब होए के सेती बाहिर-बट्टा बर बाहिर जाना परत रहिस, जऊन ह स्वच्छता, स्वास्थ्य अउ सुरक्षा के दृष्टि ले ठीक नइ रहिस। कच्चा शौचालय ल पक्का बनवाके उपयोगी बनाए के योजना कई दिन ले रहिस, फेर पईसा के कमी हो जात रहिस। अब शासन के गोधन न्याय योजना के सेती वोकर ये काम पूरा हो गीस। दिलमत बाई ल गोधन न्याय योजना के तहत गौठान म 21 हजार 295 किलोग्राम गोबर बेचके 42 हजार 590 रुपिया कमाईस। ये मा वो ह कुछ अपन पईसा जोड़ के घर म पक्का शौचालय बनवाए हे।