जगदलपुर, जिला के रहवइया मनीष के मिट्ठू पिंजरा ले उड़ा गे, जेला खोजे म मदद करे बर मनीष पुलिस तीर पहुंच गे। थाना
म वो ह आवेदन करके पुलिस ले मांग करे हे कि कइसनहो करके वोकर मिट्ठू ल खोजे जाए। ये घटना के चर्चा पूरा इलाका म
होवत हे। जगदलपुर म रहइया मनीष ठक्कर ह टीआई एमन साहू ल शिकायती पत्र देहे हे जेमा लिखे हे कि ओखर मिट्ठू
दगाबाजी करके उड़ा गे हे, ओला खोज के लाए जाए। मनीष ह पुलिस ल बताइस कि बिरसपत के भिनसरहा ओ ह देखिस कि
पिंजरा खुले हे अऊ ओखर मिट्ठू उहां ले गायब हे। पारा परोस म ओ ह मिट्ठू ल खोजिस फेर वो कहूं नइ मिलीस। जेखर
सेती ओला थाना म रिपोट दर्ज कराए ल परिस। मनीष ह पुलिस ल बताइस कि पूरा परिवार ह मिट्ठू ल बड़ लाड़ प्यार ले पाले
रहिन। घर के जम्मो मनखे मिट्ठू के बने सहिन जतन करत रहिन अऊ मिट्ठू घलोक सबो ले बने सहिन घुल मिल
गए रहिस। एखर बाद वो कइसे उड़ा के भाग सकत हे। वोकर कहना हे कि हो ना हो ये कोनो के साजिश ये। ते पाए के हम सब चाहत हन के मिट्ठू ल खोजे जाय, जेमां पुलिस मदद करय। ये मामला म एसएचओ एमन साहू ह बताइस कि आवेदन मिले हे जकर उपर कार्रवाई करे जात हे, मिट्ठू ल खोजे के कोसिस शुरू कर देहे हे।
दगाबाज पोंसवा मिट्ठू भागिस, मालिक ह थाना म करिस शिकायत
