पाली के ऐतिहासिक शिव मंदिर संस्कृति अउ विरासत के महत्वपूर्ण हिस्सा: उद्योग मंत्री श्री देवांगन

कोरबा, 9 मार्च 2024। महाशिवरात्रि पर्व म पाली म आयोजित दू दिन के पाली महोत्सव के समापन होइस। ए अवसर म मुख्य अतिथि श्री लखनलाल देवांगन, उद्योग, वाणिज्य अऊ श्रम मंत्री ह कार्यक्रम ल संबोधित करत कहिन कि पाली महोत्सव कोरबा वासी मन बर गौरव के बात हे। उमन क्षेत्रवासी मन ल महाशिवरात्रि अउ अंतराष्ट्रीय महिला दिवस के शुभकामना देवत कहिन कि पाली देवाधिदेव भगवान शिव अउ महिषासुर मर्दिनी के नगरी ये। इहां दूरिहा -दूरिहा ले मनखे भोलेनाथ के दर्शन बर आथें अऊ अपन मनोकामना पूरा होए के मनोरथ मांगथें। मंत्री श्री देवांगन ह आराध्य महादेव ले सबो के मनोरथ पूरा करे के प्रार्थना करिन। कार्यक्रम म बॉलीवुड, छालीवुड संग स्थानीय कलाकार मन अपन कला संस्कृति के शानदार प्रस्तुति दीन। जेखर हम सबो मन भरपूर आनंद लेन। उमन कहिन कि कार्यक्रम के आयोजन के उद्देश्य स्थानीय कला संस्कृति ल बढ़ावा देना, स्थानीय कलाकार मन ल मंच प्रदान करना अउ मंच के माध्यम ले आमजन के मनोरंजन करना हे। जिला प्रशासन ह महोत्सव के बहुत अच्छा आयोजन करे हे। आगू घलोक प्रशासन से ए प्रकार के आयोजन होत रहिही। कैबिनेट मंत्री ह कहिन कि प्रदेश सरकार के गठन के संगेच विकास के काम चालू हो गए हे। आयोध्या म श्रीराम प्राण प्रतिष्ठा के संग ही रामलला दर्शन योजना संचालित करे गए हे। किसान मन ल बकाया धान के बोनस ऊंखर खाता म डारे गए हे। ए साल 3100 रुपए प्रति क्विन्टल अउ 21 क्विन्टल प्रति एकड़ के दर ले अन्न दाता मन के उपज के खरीदी करे गए हे। जेखर अंतर के राशि अवइया 12 मार्च के बोनस के रूप म देहे जाही। मंत्री श्री देवांगन ह कहिन कि महिला सशक्तिकरण के दिशा म पहल करत महतारी वंदन योजना शुरू करे गए हे। जेखर तहत 10 मार्च के प्रदेश के सबो पात्र माता बहिनी मन ल एक हजार रुपिया के आर्थिक सहयोग प्रदान करे जाही। अइसनहे प्रदेश सरकार ह जनहित म आगू घलोक सरलग काम करत जाही।