रइपुर, 8 जून 2021 मंगल। मुख्यमंत्री दाउ भूपेश बघेल ह कोरोना महामारी के चलत प्रदेश के गरीब परिवार मन ल बड़का राहत देवत जुलाई ले नवम्बर महीना तक के चांउर फोकट म देहे के घोषणा करीन हे। प्रदेश के सबो बीपीएल राशन कार्ड धारक मन ल जुलाई ले नवम्बर तक पांच महीना के चांउर फोकट म देहे जाही। एकरे संगे —संग मुख्यमंत्री ह राज्य खाद्य सुरक्षा अधिनियम के तहत जारी सबो राशन कार्ड मन ल पीएम गरीब कल्याण योजना के समकक्ष अतिरिक्त चांउर तको देहे के घोषणा करीन हावय । मुख्यमंत्री के ये घोषणा ले प्रदेश के 67 लाख 90 हजार 987 राशनकार्ड के 2 करोड़ 51 लाख 46 हजार 424 सदस्य लाभान्वित होंही।
जानबा होवय कि छत्तीसगढ़ सरकार कोति ले राज्य के गरीब अउ जरूरतमंद परिवार मन ल राहत प्रदान करे बर सार्वजनिक वितरण प्रणाली के तहत महीना मई अउ जून के चांउर तको फोकट म वितरण करे गे हवय। मुख्यमंत्री दाउ बघेल के घोषणा के तहत गरीब परिवार मन ल अब जुलाई ले नवम्बर महीना तक के चांउर तको फोकट म देहे जाही। ये निर्णय ले प्रदेश के अंत्योदय राशन कार्ड, प्राथमिकता वाले राशन कार्ड, अन्नपूर्णा राशनकार्ड अउ निराश्रित अउ निशक्तजन ल जारी राशन कार्डधारी मन ल लाभ मिलही। एकरे संगे—संग राज्य खाद्य सुरक्षा अधिनियम के तहत जारी सबो राशन कार्डधारी मन ल पीएम गरीब कल्याण योजना के बरोबर उपराहा चांउर तको प्रदान करे जाही।
