नवा रायपुर के सेक्टर 26 म 6 करोड़ रूपिया ले बने रिहिस हे पांच मंजिला भवन
मुख्यमंत्री दाऊ बघेल ल राज्य वन विकास निगम कोति ले 2.10 करोड़ रूपिया के लाभांश अउ लीज रेंट के राशि के सँऊपे गिस चेक
रइपुर 24 जून 2022 ।
मुख्यमंत्री दाऊ भूपेश बघेल ह आज नवा रइपुर स्थित सेक्टर 26 म छत्तीसगढ़ राज्य वन निगम के अधिकारी-करमचारी मन बर 5.96 करोड़ रूपिया म बने नवा पांच मंजिला भवन के वर्चुअल रूप म लोकार्पण करिन। कार्यक्रम के अध्यक्षता वन अउ जलवायु परिवर्तन मंत्री श्री मोहम्मद अकबर करिन। ये बेरा म मुख्यमंत्री दाऊ भूपेश बघेल ल छत्तीसगढ़ राज्य वन विकास निगम कोति ले वन मंत्री श्री मोहम्मद अकबर अउ राज्य वन विकास निगम के अध्यक्ष अउ विधायक बसना श्री देवेन्द्र बहादुर सिंह कोति ले बछर 2020-21 के लाभांश अउ लीज रेंट 2.10 करोड़ रूपिया के चेक तको सँऊपे गिस। येमा निगम के लाभांश के रूप म एक करोड़ 11 लाख रूपिया के लीज रेंट के रूप म 99 लाख रूपिया के राशि तको संघरे हे।
मुख्यमंत्री दाऊ भूपेश बघेल ह राज्य वन विकास निगम के नवा बने आवासीय परिसर के लोकार्पण करत कहिन कि ये भवन के बने ले विभागीय अधिकारी-करमचारी मन के बने रेहे-बसे के बेवस्था हो जही। वोमन खुष होवत कहिन कि छत्तीसगढ़ राज्य वन विकास निगम के गठन के 21 बछर के बाद निगम डाहर ले अपन स्वयं के आय ले विभागीय अधिकारी-करमचारी मन बर पांच मंजिला भवन बनाए गे हवय। एकर बर उन निगम ल विशेष रूप ले बधई अउ शुभकामना दीन।
मुख्यमंत्री दाऊ बघेल ह कहिन कि छत्तीसगढ़ सरकार कोति ले आर्थिक रूप ले पिछड़े वर्ग के सामाजिक अउ आर्थिक स्थिति केे सुधार बर सरलग प्रयास करत हावय। जेमा वनांचल के लोगन मन के सामाजिक अउ आर्थिक स्थिति ल बने बनाए म वन विकास निगम तको अहम भागीदारी रिहिस। मुख्यमंत्री दाऊ बघेल ह कहिन कि छत्तीसगढ़ सरकार वनवासी मन के जीवन बन गढ़ बर संकल्प उठाके बूता करत हावयं। जेकर ले वनवासी मन के जीवन के आय के स्त्रोत म बढ़ौतरी होवत हे अउ लोगन मन के हमर सरकार के विकास, विश्वास अउ सुरक्षा के नीति के चलत राज्य के वनांचल के लोगन मन म तको एक नवा बदलाव अउ उछाह दिखत हावय।