रायपुर, 28 जनवरी 2020। त्रिस्तरीय पंचायत चुनाव के पहली चरण बर मंगलवार बिहनिया ले मतदान शुरु होगे हे. पहली चरण म रायपुर, बस्तर समेत 57 विकासखंड मन के गाँव मन म चुनाव होवत. येखर बर कुल 12 हजार मतदान केंद्र बनाए गए हे. बस्तर समेत सबो जिला म सुरक्षा के पुख्ता इंतजाम करे गए हे. नक्सल प्रभावित क्षेत्र म बिहनिया 6.45 बजे ले मंझनिया 2 बजे तक अउ आने जगह मन म बिहनिया 7 बजे ले 3 बजे तक मतदान करे जा सकत.
आप मन ल बता देथन कि तीनों चरण के चुनाव ल मिलाके कुल 2 लाख 86 हजार 574 अभ्यर्थी चुनाव मैदान म खड़े हे. जोन म पंच पद बर 2 लाख 23 हजार 737 अभ्यर्थी, सरपंच पद बर 48 हजार 412 अभ्यर्थी, जनपद पंचायत सदस्य बर 12 हजार 320 अभ्यर्थी अउ जिला पंचायत सदस्य बर 1905 अभ्यर्थी चुनाव मैदान म हे.
राज्य निर्वाचन आयोग ले प्राप्त जानकारी के अनुसार प्रदेश म एक लाख 60 हजार 725 पंच पद, 11 हजार 664 सरपंच पद, 2 हजार 979 जनपद पंचायत सदस्य पद अउ 400 जिला पंचायत सदस्य पद के संख्या हे. वहीं दूसरा चरण म 31 जवनरी अउ तीसरा चरण म 3 फरवरी के वोट डाले जाही.
