- आदर्श आचार संहिता प्रभावशील
- एक करोड़ 44 लाख 68 हजार 763 मतदाता चुनहीं अपन प्रतिनिधि
रायपुर, प्रदेश म त्रिस्तरीय पंचायतीराज संस्था मन के प्रतिनिधि मन के आम चुनाव बर मतदान 28 जनवरी, 31 जनवरी अऊ 3 फरवरी के होही। मतदान समाप्ति के बाद उही दिन मतगणना घलोक होही। राज्य निर्वाचन आयुक्त ठाकुर राम सिंह ह आज इहां आयोजित पत्रकार-वार्ता म प्रदेश म पंचायत आम निर्वाचन के परखर कार्यक्रम के घोषणा करिन। निर्वाचन कार्यक्रम के घोषणा के संगेच ग्राम पंचायत क्षेत्र मन म आदर्श आचरण संहिता प्रभावशील हो गए हे।
प्रदेश म पंचायत आम निर्वाचन के तहत एक लाख 60 हजार 725 वार्ड पंच, 11 हजार 664 सरपंच, दू हजार 979 जनपद पंचायत सदस्य अऊ 400 जिला पंचायत सदस्य चुने जाही। एखर बर प्रदेश भर म 29 हजार 525 मतदान केन्द्र बनाए जाही। पंचायत निर्वाचन के समय कुल एक करोड़ 44 लाख 68 हजार 763 ग्रामीण मतदाता अपन मताधिकार के परयोग करहीं। तीन चरण म होवइया मतदान के समय पहिली चरण म 28 जनवरी 2020 के 57 जनपद पंचायत के 12 हजार 484 मतदान केन्द्र मन म, दूसर चरण म 31 जनवरी 2020 के 36 जनपद पंचायत मन के छै हजार 289 मतदान केन्द्र मन म अऊ तीसर चरण म 2 फरवरी 2020 ल 53 जनपद पंचायत के दस हजार 714 मतदान केन्द्र मन म वोट डारे जाही। सुव्यस्थित रूप ले निर्वाचन संपन्न कराए बर आयोग कोति ले एक हजार 520 क्लस्टर बनाय गए हे।
