दिल्ली, देश के महामहिम राष्ट्रपति श्रीमती द्रौपदी मुर्मु जी ह बस्तर अंचल के गढ़बेंगाल निवासी श्री पंडीराम मंडावी ल साल 2025 के पद्मश्री सम्मान ले अलंकृत करिन। ये सम्मान ओ मन ल जनजातीय वाद्य यंत्र निर्माण अऊ काष्ठ शिल्प कला के क्षेत्र म ऊंखर अद्भुत अउ उल्लेखनीय योगदान बर प्रदान करे गीस।
श्री मंडावी ह पारंपरिक गोंड अऊ मुरिया समाज के सांस्कृतिक धरोहर ल सहेजे अऊ आगू बढ़ाय बर उदीम करिन। उंखर ये उदीम ह न केवल बस्तर के कला ल राष्ट्रीय मंच दीन, बल्कि अवइया पीढ़ी बर एक प्रेरणा के स्रोत घलोक प्रस्तुत करिन।
मुख्यमंत्री श्री विष्णु देव साय ह श्री मंडावी ल बधाई देवत कहिन के ये सम्मान छत्तीसगढ़ के जनजातीय प्रतिभा अऊ सांस्कृतिक समृद्धि के गौरवपूर्ण चिन्हारी ये। उमन कहिन के श्री मंडावी जइसे कलाकार मन ह अपन साधना ले ये सिद्ध करे हें के हमर मिट्टी के कला विश्वपटल म छा सकत हे। ये पद्मश्री सम्मान बस्तर के लोकपरंपरा, शिल्प अऊ सांस्कृतिक चेतना ल राष्ट्रीय गौरव देवाए के दिशा म एक महत्वपूर्ण उपलब्धि हे।
गढ़बेंगाल के श्री पंडीराम मंडावी ल पद्मश्री सम्मान, मुख्यमंत्री श्री विष्णुदेव साय ह दीन शुभकामना
