रायपुर, नेहा राठौर के खबर/ मुख्यमंत्री श्री भूपेश बघेल 17 अपरेल के संझा के बेर राजधानी रायपुर के पंडरी ऑक्सीजोन म इस्थापित शहीद नंदकुमार पटेल के मनखे अकार के मुरति के अनावरण करही। रायपुर स्मार्ट सिटी लिमिटेड कोती ले ऑक्सीजोन के तिर पंडरी म शहीद नंदकुमार पटेल के मनखे अकार के मुरति इस्थापित करे गए हे। पंचधातु ले बने 400 किलो वजन के ए प्रतिमा के ऊंचई 9 फिट हे। ए प्रतिमा इस्थल के सौंदर्यीकरण ब आकर्षक रोशनी व्यवस्था करे के संग मिनी उद्यान घलो तियार करे गए हे। बईठक व्यवस्था के संगे म ही लाल बलुआ पथरा ले ए जघा के सुन्दरता ल बढ़ात हे। ऐला बनाए ब कुल लागत 80 लाख रूपिया लगे हे।
मिलनसार, समाजिक, राजनैतिक परिदृश्य म सदेव अपन चमक फइलाए वाले छत्तीसगढ़ के सपूत शहीद नंदकुमार पटेल जी के जनम 08 नवंबर 1953 के रायगढ़ के गांव नंदेली म होइस। मूल रूप ले किसान परिवार के बेटा श्री पटेल के मन, कर्म अउ वचन ले ठेठ छत्तीसगढ़िया संस्कार के झलक ह सफ्फा देखई देवए। श्री पटेल ह अपन आत्मीय व्यवहार कुशलता के संग जनता मन के बीच पहुंचे। गांव के सरपंच ले केबिनेट मंत्री अउ कतको कन बड़का पद म सुसोभित करत हुए, ओ ह अपन ईमानदारी, परिश्रम अउ सहजता ले हमेशा पद के मान ल बढ़ाए। श्री पटेल खरसिया विधानसभा ले 05 घ विधायक बनिस। 25 मई 2013 के झीरम घाटी म होए नक्सली हमला म श्री पटेल ह शहीद होगे रहीन हे ।
